ދަ ޑިމޮކްރެޓްސް އުވާލާ އެ ޕާޓީގެ މެންބަރުންނާއެކު އަލުން އެމްޑީޕީއާ ގުޅެން ނިންމަވާފައިވާ ކުރީގެ ރައީސް މުހައްމަދު ނަޝީދު އަދި ޑިމޮކްރެޓްސްގެ މެންބަރުންނަށް ހޫނު މަރުހަބާއެއް ކިޔަން ފެންނަ ކަމަށް މިރޭ ކުރިއަށްދާ އެމްޑީޕީ ގައުމީ މަޖިލީހުގެ ބައްދަލުވުމުގައި ވާހަކަ ދެއްކެވި ގިނަ މެންބަރުން ވިދާޅުވެއްޖެ އެވެ.

އިދިކޮޅު އެމްޑީޕީގެ ގައުމީ މަޖިލީހުން މިރޭ ކުއްލި ނުރަސްމީ ބައްދަލުވުމެއް ބާއްވަން ނިންމީ ނަޝީދު އާއި ޑިމޮކްރެޓްސްގެ މެންބަރުން އެމްޑީޕީއާ ގުޅެން އިއްޔެ ނިންމުމާ ގުޅިގެންނެވެ. މި ބައްދަލުވުމުގައި ވާހަކަދައްކަވަމުން ގެންދަވާ ގައުމީ މަޖިލީހުގެ ގިނަ މެންބަރުންގެ ރާގު ހުރީ ޕާޓީއާ އަލުން ގުޅޭ މެންބަރުންނަށް ހޫނު މަރުހަބާއެއް ކިޔުމަށެވެ.

އެމްޑީޕީގެ ރައީސް އަބްދުﷲ ޝާހިދު ވަނީ މާޒީގެ އަޅުންނަށް ވެގެން ތިބުމުގެ ބަދަލުގައި ނަޝީދާއި އެމަނިކުފާނާއެކު އެނބުރި ވަޑައިގަންނަވާ ބޭފުޅުންނަށް މަރުހަބާ ކިޔަން ފެންނަ ކަމަށް ވިދާޅުވެފަ އެވެ. އެ ޕާޓީގެ ކުރީގެ ޗެއާޕާސަން މާރިޔާ އަހުމަދު ވެސް ވަނީ ކުރީގެ ކަންކަން އިޔާދަ ނުވާނެހެން ޕާޓީ ބޮޑުކުރަން ފެންނަ ކަމަށް ވިދާޅުވެފަ އެވެ.

މައުޟޫޢުތަށް