ނ. އަތޮޅަށް ރައީސުލްޖުމްހޫރިއްޔާ ކުރައްވަން ހަމަޖެހިފައި އޮތް ދަތުރު، ޕްރެޝަރާ ހެދި ފަސްކޮށްފި
އަދަދު
6 ޖުލައި 2025 | އާދިއްތަ | 3:20
ނ. އަތޮޅަށް މި ހަފުތާގައި ރައީސުލްޖުމްހޫރިއްޔާ މުހައްމަދު މުއިއްޒު ކުރައްވަން ހަމަޖެހިފައި އޮތް ދަތުރު ކުއްލިއަކަށް ފަސްކޮށްފި އެވެ.
ނ. އަތޮޅަށް ރައީސް ދަތުރެއް ކުރަން ނިންމަވަފައިވާކަން އެ އަތޮޅުގެ ކައުންސިލްތަކަށް ރައީސް އޮފީހުން އޮތީ ރަސްމީކޮށް އަންގައިފަ އެވެ. އަދި ދަތުރުގެ ކަންކަން ހަމަޖެއްސުމަށްޓަކައި އެ އަތޮޅުގެ ވެރިކަން ކުރާ މަނަދޫއަށް ސިފައިންނާއި ރައީސް އޮފީހުގެ ބޭފުޅުން ވެސް އިއްޔެ ވަޑައިގެން ހަރަކާތްތެރިވި ކަމަށް އެ އަތޮޅު ކައުންސިލުން "އަދަދު" އަށް މައުލޫމާތު ދިނެވެ.
ނަމަވެސް މިއަދު ކުއްލިއަކަށް އެ ދަތުރު ފަސްކޮށްފައިވާކަން ކައުންސިލްތަކަށް ފޯނުން ގުޅައި އަންގާފައިވާ ކަމަށް ނ. އަތޮޅު ކައުންސިލުގެ ރައީސް، މުހައްމަދު ބަޝީރު އަދި ވެލިދޫ ކައުންސިލުގެ ރައީސް، އާތިފް ހުސެއިން މި ނޫހަށް ކަށަވަރު ކޮށްދެއްވި އެވެ.