ރަސްމީ ހައިސިއްޔަތެއް ނެތް ފަސްޓް ލޭޑީގެ ރަސްމީ ދަތުރުތައް ގިނަވެއްޖެ
އަދަދު
10 ޖުލައި 2025 | ބުރާސްފަތި | 8:50
ރައީސުލްޖުމްހޫރިއްޔާ މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދަށް ގާނޫނުއަސާސީ އަދި ގާނޫނުން ދައުލަތުގެ ރަސްމީ ހައިސިއްޔަތެއް ދީފައިނުވި ނަމަވެސް ސަރުކާރުގެ އެކި ރަސްމިއްޔާތުތަކަށް އެކަމަނާ ކުރައްވާ ދަތުރުތައް ގިނަވެއްޖެ އެވެ.
ރައީސް މުއިއްޒުގެ އަނބިކަނބަލުން ސާޖިދާ މިއަދު ވަނީ ފޭދޫ ހެލްތު ސެންޓަރުގެ 43 ވަނަ އަހަރީ ޖަލްސާ ފާހަގަ ކުރުމުގެ ރަސްމިއްޔާތަށް ފޭދޫ އަށް ވަޑައިގެންފަ އެވެ. އޭގެ ކުރިން، ކުޅުދުއްފުށީ ރީޖަނަލް ހޮސްޕިޓަލުގެ 43 ވަނަ އަހަރީ ދުވަސް ފާހަގަ ކުރަން މިދިޔަ އާދީއްތަ ދުވަހު ހދ. ކުޅުދުއްފުއްޓަށް ވެސް އެކަމަނާ ވަޑައިގެންނެވި އެވެ.
އެ ދެ ދަތުރުގައި ވެސް ސާޖިދާ ވަޑައިގެންނެވީ ޝަރަފުވެރި މެހެމާނުގެ ހައިސިއްޔަތުންނެވެ. އެކަމަނާ ކުރައްވާ ދަތުރުތަކަށް ހަރަދު ކުރަނީ ދައުލަތުގެ ފައިސާ އެވެ. ދަތުރުތަކުގެ ހުރިހާ ހަރަދެއް ހަމަޖެއްސުމުގެ އިތުރުން އެކަމަނާއަށް ސެކިއުރިޓީ ވެސް ފޯރުކޮށްދޭންޖެހެ އެވެ.