ރާއްޖެއަށް ކުރެއްވި ދަތުރަށްފަހު މޯދީ ފުރާވަޑައިގެންފި
އަދަދު
26 ޖުލައި 2025 | ހޮނިހިރު | 6:44
ރާއްޖޭގެ 60 ވަނަ މިނިވަން ދުވަސް ފާހަގަކުރަން މިއަދު ބޭއްވި ހަރަކާތުގައި ޝަރަފުވެރި މެހެމާނެއްގެ ގޮތުގައި ބައިވެރިވުމަށްފަހު އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ދެ ދުވަހުގެ ދަތުރު ނިންމަވާލެއްވުމަށްފަހު ފުރާވަޑައިގެންފި އެވެ.
އިއްޔެ ހެނދުނު މޯދީ ރާއްޖެ ވަޑައިގަތަމުން ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ ރައީސް ޑރ. މުހައްމަދު މުއިއްޒު އެވެ. އެއަށްފަހު ޖުމްހޫރީ މައިދާނުގައި މޯދީއަށް ރަސްމީ އިއްޒަތުގައި މަރުހަބާ ދެންނެވީ 21 ބަޑީގެ ސަލާމެއް ދެއްވުމަށް ފަހު އެވެ.
ދެ ގައުމުގެ ދެމެދުގައި އިއްޔެ ރައީސް އޮފީހުގައި ބޭއްވި ރަސްމީ މަޝްވަރާތަކަށްފަހު ވާހަކަ ދައްކަވަމުން މޯދީ ވިދާޅުވީ، މީގެ ކުރިން ވެސް އިންޑިއާއިން ރާއްޖެއަށް އެހީތެރިކަން ފޯރުކޮށްދިން ގޮތަށް އަބަދުވެސް އެހީތެރިކަން ފޯރުކޮށްދޭނެ ކަމަށެވެ.