ޒަކިއްޔާގެ މަރު: ދައުވާކުރަން ހުށަހެޅި ފުލުހުންގެ މައުލޫމާތު ހާމަ ކުރަން އެންއައިސީން ދެކޮޅު ހަދަނީ
އަދަދު
12 އޯގަސްޓު 2025 | އަންގާރަ | 8:25
މިދިޔަ އަހަރުގެ ސެޕްޓެމްބަރު 10، ގައި ނ. ހޮޅުދޫގައި މަރުވެފައި އޮއްވައި ފެނުނު އެ ރަށު މާރަނގަ، ޒަކިއްޔާ މޫސާ، 50، ގެ މަރުގެ ތަހުގީގުގައި އިހުމާލުވި ކަމަށް ބެލެވޭ ފުލުހުންގެ މައުލޫމާތު ހާމަ ކުރަން ނެޝަނަލް އިންޓަގްރިޓީ ކޮމިޝަން (އެންއައިސީ) އިން ދެކޮޅު ހަދައިފި އެވެ.
ތަހުގީގުގައި އިހުމާލުވި ކަމަށް ބެލެވޭ ހަ ފުލުހެއްގެ މައްޗަށް ދައުވާކޮށްދިނުމަށް އެދި އެންއައިސީ އިން ވަނީ ޕްރޮސެކިއުޓާ ޖެނެރަލްގެ އޮފީހަށް ފޮނުވައިފަ އެވެ. އެ ފުލުހުންގެ މައުލޫމާތު ހޯދަން އަދަދު އިން އެ ކޮމިޝަންގެ ރައީސް ގާސިމް އަބްދުލް ކަރީމްއަށް ގުޅުމުން އެ މައުލޫމާތު ދިނުމަށް އޭނާ ވަނީ ދެކޮޅު ހަދައިފަ އެވެ.
އެންއައިސީން މައުލޫމާތު ދިނުމަށް ގެންގުޅޭ އުސޫލުގެ ދަށުން ދައުވާކުރާ ފުލުހުންގެ މައުލޫމާތު ހޯދަން އެ ކޮމިޝަނަށް މި ނޫހުން އީމެއިލް ކުރުމުން ވެސް އެ މައުލޫމާތު ފޯރުކޮށްދީފައެއް ނުވެ އެވެ.