މުއިއްޒުގެ ދަތުރުގެ ތެރެއިން ޗައިނާ އާއެކު 11 އެއްބަސްވުމެއްގައި ސޮއިކޮށްފި, ތަފްސީލެއް ހާމައެއް ނުކުރޭ
އަދަދު
2 ސެޕްޓެމްބަރު 2025 | އަންގާރަ | 6:54
ޗައިނާގެ ރައީސް ޝީ ޖިންޕިންގެ ދައުވަތަކަށް ޝަންހާއީ ކޯޕަރޭޝަން އޯގަނައިޒޭޝަން (އެސްއީއޯ) ސަމިޓުގައި ބައިވެރިވެވަޑައިގަތުމަށް ރައީސް މުހައްމަދު މުއިއްޒު ކުރައްވަމުން ގެންދަވާ ދަތުރުގެ ތެރެއިން އެ ގައުމުގެ ސަރުކާރާއެކު ރާއްޖެއިން 11 އެއްބަސްވުމެއްގައި ސޮއިކޮށްފި އެވެ.
އާންމު އުސޫލެއްގެ ގޮތުން މުއިއްޒު ކުރައްވާ ދަތުރުތަކުގައި ސޮއިކުރާ އެއްބަސްވުންތަކުގެ ނަންތައް ރައީސް އޮފީހުގެ ހަބަރުގައި ހިމަނަ އެވެ. ނަމަވެސް، މިއަދު މައުލޫމާތުތައް އާންމުކުރިއިރު އެއްވެސް ވަރަކަށް ނަމެއް ނުވަތަ އިތުރު ތަފްސީލެއް ވެސް ހާމަކޮށްފައި ނުވެ އެވެ.
"އޭގެ ތެރޭގައި އިގުތިސޯދީ ތަރައްގީ، އުމުރާނީ ތަރައްގީ އަދި އިއާދަކުރަނިވި ހަކަތައިގެ ދާއިރާއިން ދެ ގައުމުން އެއްބާރުލުން އިތުރުކުރުމާ ގުޅޭ ފަހުމުނާމާތައް ހިމެނޭ. މި ފަހުމުނާމާތަކަކީ ކުރިއަށް އޮތް ތަނުގައި ދެ ގައުމުގެ މެދުގައި އޮތް ޒަމާންވީ ގުޅުން އިތުރަށް ބަދަހިވެގެންދިޔުމާއެކު، ދެމެހެއްޓެނިވި ތަރައްގީއަށް އެޅިގެންދާ މުހިންމު ފިޔަވަޅަކަށް ވެގެންދާނެ،" ރައީސް އޮފީހުން ބުނެފައި ވެ އެވެ.