މަސް ގަންނަ އަގު ސަރުކާރުން ބޮޑުކުރަން އުޅޭތީ މަހުގެ ވިޔަފާރިކުރާ ކުންފުނިތަކުގެ ކަންބޮޑުވުން
އަދަދު
25 ސެޕްޓެމްބަރު 2025 | ބުރާސްފަތި | 10:38
ސަރުކާރުގެ މަސް ކުންފުނި، މިފްކޯ އިން ކަނޑުމަސް ގަންނަ އަގު 20ރ. އަށް ބޮޑުކުރަން މަސައްކަތް ކުރަމުންދާ ކަމަށް ރައީސް މުހައްމަދު މުއިއްޒު ވިދާޅުވެފައިވާތީ، އެކަމާ ގުޅިގެން މަސްވެރިކަމުގެ ވިޔަފާރިކުރާ ކުންފުނިތަކުން ކަންބޮޑުވުން ފާޅުކޮށްފި އެވެ.
މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓާސް އެސޯސިއޭޝަން (އެމްއެސްޕީއީއޭ) އިން ނެރުނު ނޫސް ބަޔާނެއްގައި ބުނީ މިފްކޯއަށް ގަންނަ މަހުގެ އަގު ބޮޑުކުރާނެ ކަމަށް މުއިއްޒު ވިދާޅުވުމާ ގުޅިގެން އެކަމުގެ ކަންބޮޑުވުންތައް އެކި ކުންފުނިތަކުން އެ އެސޯސިއޭޝަނާ ހިއްސާކޮށްފައިވާ ކަމަށެވެ.
"މަސްވެރިކަމުގެ ދާއިރާގައި ޙަރަކާތްތެރިވާ ކުންފުނިތަކުން ފާހަގަކުރާ ގޮތުގައި، ކަނޑުމަހުގެ ގަންނަ އަގަށް ގެންނަން ހުށަހަޅާފައި މިވާ ބަދަލަކީ، ބައިނަލްއަޤްވާމީ މާކެޓްތަކަށް ދެމެހެއްޓެނިވި އުސޫލަކުން މަސް އެކްސްޕޯޓްކުރުމަށް ހުރަސްއެޅޭފަދަ މިންވަރެއްގެ ބޮޑު އަގެއް،" އެމްއެސްޕީއީއޭ އިން ބުންޏެވެ.