ކަރެކްޝަންގެ ޖަލުތައް އެލާޓަށް، ހުރިހާ އޮފިސަރުން ޑިއުޓީއަށް ނެރެފި
އަދަދު
3 އޮކްޓޯބަރު 2025 | ހުކުރު | 6:25
އިދިކޮޅު މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން މިރޭ މާލޭގައި ބޮޑު އެއްވުމެއް ބާއްވަން ރާވާފައިވާ ދަނޑިވަޅެއްގައި، މޯލްޑިވްސް ކަރެކްޝަނަލް ސާވިސްއިން ބަލަހައްޓާ ހުރިހާ ޖަލެއް އެލާޓަށް ގެނެސް ހުރިހާ އޮފިސަރުން ޑިއުޓީއަށް ނެރެފި އެވެ
މިކަން އަންގާ ކަރެކްޝަނަލް ސާވިސްއިން މުވައްޒަފުން ފޮނުވި އެންގުމުގައި ވަނީ މިއަދު ހަވީރު 5:00 އިން ފެށިގެން ހެޑް އޮފީހުގައި މަސައްކަތް ކުރާ ހުރިހާ މުވައްޒަފުން އެލާޓު ކުރެވިގެން ދާނެ ކަމަށެވެ. މި އެންގުމުގައި އެލާޓަށް ގެންނަ ސަބަބެއް ބަޔާންކޮށްފައި ނެތެވެ.
ކަރެކްޝަންސް އެލާޓަށް ގެނައިއިރު އިސްތިސްނާ ކުރީ މާބަނޑު އޮފިސަރުންނާއި އެއް އަހަރުން ދަށުގެ ދަރިން ތިބި އަންހެން އޮފިސަރުން އެކަންޏެވެ. ބާކީ ތިބި ހުރިހާ އޮފިސަރުން ޓެކްޓިކަލް ކިޓުގައި ހެޑް އޮފީހަށް ހާޒިރުވުމަށް ވަނީ އަންގާފަ އެވެ.