މަޖިލީހަށް އޮންލައިންކޮށް ޕެޓިޝަން ހުށަހެޅޭ ނިޒާމު ތައާރަފުކުރުން އަންނަ އަހަރަށް ފަސްކޮށްފި
އަދަދު
11 އޮކްޓޯބަރު 2025 | ހޮނިހިރު | 5:11
ރައްޔިތުން ކަންބޮޑުވާ ކަންކަމުގައި އެކުލަވާލާ ޕެޓިޝަންތައް އޮންލައިންކޮށް ރައްޔިތުންގެ މަޖިލީހަށް ހުށަހެޅޭނެ ގޮތަށް ފަރުމާކުރަމުންދާ އޮންލައިން ޕެޓިޝަން ނިޒާމު ތައާރަފުކުރުން ރައްޔިތުންގެ މަޖިލީހުން ފަސްކޮށްފި އެވެ.
މި ނޫހަށް މައުލޫމާތު ލިބިފައިވާ ގޮތުގައި މި ނިޒާމު ތައާރަފުކޮށް މަޖިލީހުގެ ވެބްސައިޓު މެދުވެރިކޮށް ޕެޓިޝަން ހުށަހެޅޭނެ ގޮތް ހަދަން މީގެ ކުރިން ނިންމާފައި އޮތީ މި މަހުގެ ތެރޭގަ އެވެ. އޮންލައިންކޮށް މަޖިލީހަށް ޕެޓިޝަން ހުށަހެޅޭނެ ގޮތެއް މިހާރު ނޯވެ އެވެ.
މިކަމާ ގުޅިގެން އަދަދު ނޫހުން ސުވާލުކުރުމުން މަޖިލީހުގެ މީޑިއާ އޮފިސަރު، އަހުމަދު މާން އައްސަދު ވިދާޅުވީ އޮންލައިން ޕެޓިޝަން ނިޒާމު ތައާރަފުކުރުން ފަސްކޮށްފައިވަނީ ޕައިލެޓް ޓެސްޓިން ބޭނުންވާތީ ކަމަށެވެ. މަޖިލީހުން އެ ނިޒާމު ދެން ތައާރަފުކުރާނީ އަންނަ ފެބްރުއަރީ މަހު ކަމަށް އޭނާ ވިދާޅުވި އެވެ.