އަނެއްކާ ވެސް "އަންނަ އަހަރު" ކަމަށް ވިދާޅުވެ އައްޑޫ ބްރިޖުގެ ވައުދު މުއިއްޒު ތަކުރާރު ކުރައްވައިފި
އަދަދު
5 ނޮވެމްބަރު 2025 | ބުދަ | 2:26
މިދިޔަ އަހަރު ފަށާނެ ކަމަށް ރައީސް މުއިއްޒު ވައުދުވެވަޑައިގެންނެވި އައްޑޫ ސިޓީ ހިތަދޫ އާއި ހުޅުދޫ-މީދޫ ގުޅާލާ ބްރިޖުގެ އަމަލީ މަސައްކަތުގެ އެއްވެސް މަސައްކަތެއް ނުފަށައި، ގާތްގަނޑަކަށް ދެ އަހަރު ދުއްވައިލުމަށް ފަހު، އެ ބްރިޖުގެ އަމަލީ މަސައްކަތް "އަންނަ އަހަރު" ފަށާނެ ކަމަށް ވިދާޅުވެ، ވައުދު ތަކުރާރު ކުރައްވައިފި އެވެ.
އައްޑޫއަށް ކުރައްވާ ދަތުރުގެ ތެރެއިން ހުޅުދޫ-މީދޫ ރައްޔިތުންނާ ބައްދަލުކުރައްވާ މުއިއްޒު މިއަދު ވިދާޅުވީ 15 ކިލޯމީޓަރުގެ އައްޑޫ ބްރިޖުގެ އަމަލީ މަސައްކަތް އަންނަ އަހަރު ތެރޭގައި ފެށުމަކީ އަމާޒެއް ކަމަށެވެ.
"އިރާދަކުރެއްވިއްޔާ މި އަންނަ އަހަރުގެ ތެރޭގައި މި ބްރިޖުގެ މަސައްކަތް ފެށުމަކީ އަޅުގަނޑުމެންގެ އަމާޒު. އިރާދަކުރެއްވިއްޔާ އެގޮތަށް އެކަން ދާނެ،" މުއިއްޒު ވިދާޅުވި އެވެ.