ބަހާލި ޕްރޮޖެކްޓުތަކަށް ފައިސާ ދޫކުރުން ހުއްޓުވުމަށާއި މާލިއްޔަތު ގަވާއިދަށް ގެނައި އިސްލާހު ބާތިލުކުރަން އެމްޑީޕީން ކޯޓަށް ދަނީ
އަދަދު
8 ނޮވެމްބަރު 2025 | ހޮނިހިރު | 10:45
ސަރުކާރުން ބުރާސްފަތި ދުވަހު ބޮޑު ހަފުލާއެއް ބާއްވާ ބީލަމަށް ނުލައި ބަހާލި 206 ޕްރޮޖެކްޓަށް ފައިސާ ދޫކުރުން ހުއްޓުވުމަށާއި އެކަން ކުރުމަށް މަގުފަހިވާނެހެން މާލިއްޔަތު ގަވާއިދަށް ގެނައި އިސްލާހު ބާތިލުކުރުމަށް ކޯޓަށް ދާން އިދިކޮޅު އެމްޑީޕީގެ ގައުމީ މަޖިލީހުން މިރޭ ނިންމައިފި އެވެ.
މިރޭ ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމުގައި މި މައްސަލާގައި ކޯޓަށް ދިޔުމަށާއި މިކަމާއި ގުޅިގެން ދެން އުފެދޭ އެމްޑީޕީގެ ސަރުކާރަކުން އަމަލުކުރާނެ ގޮތްތައް ހިމެނޭ ގަރާރެއް ހުށަހެޅުއްވީ ހޯރަފުށީ ދާއިރާގެ ރައީސް އަހުމަދު ސަލީމް އެވެ. މި ގަރާރު ފާސްވީ ބައްދަލުވި މެންބަރުންގެ އިއްތިފާގުންނެވެ.
މިކަމާއި ގުޅިގެން ފާހަގަވި ކަންކަމުގެ ގޮތުގައި ސަލީމްގެ ގަރާރުގައި ބުނެފައިވާ ކަންކަމުގެ ތެރޭގައި ސަރުކާރުގެ މަޝްރޫއުތައް ބީލަމަށް ނުލައި ދެވޭނެހެން މާލިއްތު ގާނޫނަށް ގެނައި ބަދަލު މާލިއްޔަތު ގާނޫނާއި ހިލާފު ވުން ހިމެނެ އެވެ.