ބޭންކުގެ އުސޫލުތައް މުގުރާލާފައި އަމިއްލަ ކުންފުނިތަކަށް ލޯނު ދޭ ވާހަކަ ދޮގުކޮށްފި
އަދަދު
9 ނޮވެމްބަރު 2025 | އާދިއްތަ | 10:41
ސަރުކާރުން މި ފަހުން އަމިއްލަ ކުންފުނިތަކަށް ބަހާލި ޕީއެސްއައިޕީ ޕްރޮޖެކްޓުތަކަށް ބޭންކް އޮފް މޯލްޑިވްސް (ބީއެމްއެލް) ގެ ބޯޑުގެ ހުއްދައާ ނުލައި، ލޯނު ދިނުމުގެ އުސޫލުތަކާ ހިލާފަށް ލޯނުތައް ދޫކުރަމުންދާ ކަމަށް ކުރާ ތުހުމަތުތައް އެ ބޭންކުން ދޮގުކޮށްފި އެވެ.
ބީއެމްއެލްއަށް މި ތުހުމަތުތައް އަމާޒުވީ 2.6 ބިލިއަން ރުފިޔާގެ ޕްރޮޖެކްޓުތައް ހިންގަނީ ކޮންޓްރެކްޓާ ފައިނޭންސިން މޮޑެލްގެ ދަށުން ކަމަށް އިއުލާނުކުރުމުންނެވެ. މި ނޫހަށް މައުލޫމާތު ދިން ބައެއް މީހުން ބުނި ގޮތުގައި ކޮންޓްރެކްޓަރުން އެއްބަސްވުންތަކުގައި ސޮއިކުރީ ހާއްސަ އުސޫލުތަކެއްގެ ދަށުން ލޯނުގެ ކަންކަން ހަމަޖައްސައިދޭން ކަމުގެ ޔަގީންކަން ސަރުކާރުން ދިނުމުންނެވެ.
ނަމަވެސް ބީއެމްއެލްއިން ނެރުނު ދިގު ބަޔާނެއްގައި ބުނީ، ބޭންކުގެ ބޯޑާއި މެނޭޖުމަންޓުން މަސައްކަތް ކުރަނީ ފުރިހަމަ ޕްރޫޑެންސް (ސަމާލުކަން ބަހައްޓައިގެން) އާއި މިނިވަންކަމާއެކުގައި ކަމަށެވެ. އަދި، އެ ބޭންކުން އަންނަނީ އެމްއެމްއޭ އާއި ބައިނަލްއަގުވާމީ އެންމެ ހަރުދަނާ ސްޓޭންޑަޑުތައް ހިފަހައްޓަމުން ކަމަށް ވެސް ބީއެމްއެލްއިން ބުންޏެވެ.