ހަރަދު ކުޑަކުރުން އިބިލީހުގެ ކައިވެންޏަށް ވެއްޖެ، 2026 ގެ ބަޖެޓުގައި އެ ވާހަކަ ނުވެސް ނެތް: އޮޑިޓާ ޖެނެރަލް
އަދަދު
9 ނޮވެމްބަރު 2025 | އާދިއްތަ | 5:09
އަހަރަކުން އަހަރަކަށް ދައުލަތުގެ ދަރަނި ބޮޑުވާ މައިގަނޑު ސަބަބަކީ ހަރަދު ކުޑަކުރުން ލަސްކުރުން ކަމަށާއި އެކަން މިހާރު އިބިލީހުގެ ކައިވެންޏަށް ވެފައިވާ ކަމަށް ވިދާޅުވެ އޮޑިޓާ ޖެެނެރަލް ހުސައިން ނިޔާޒީ ނުރުހުން ފާޅުކުރައްވައިފި އެވެ.
އަންނަ އަހަރަށް ލަފާކޮށް ހުށަހަޅާފައިވާ 64.2 ބިލިއަން ރުފިޔާގެ ބަޖެޓު ދިރާސާ ކުރާ މަޖިލީހުގެ ކޮމިޓީން މިއަދު އޮޑިޓާ ޖެނެރަލް ނިޔާޒީ އަދި އެ އޮފީހުގެ އިސްވެރިން ހާޒިރުކޮށް، އެ އޮފީހުގެ ހިޔާލާއި މަޝްވަރާ ދަނީ ހޯދަމުންނެވެ.
އެ ބައްދަލުވުމުގެ ތެރެއިން ދަރަނި ބޮޑުވާ ސަބަބުތަކާއި ގުޅޭގޮތުން އަދި ދަރަނި ބޮޑުވުމަށް ހައްލެއް ފެންނަން އޮތްތޯ ސުވާލުކުރެއްވީ ހަނިމާދޫ ދާއިރާގެ މެންބަރު އަބްދުލްގަފޫރު މޫސާ އެވެ. އެ ސުވާލަށް ޖަވާބު ދެއްވަމުން ނިޔާޒީ ވިދާޅުވީ ހަރަދުކުޑަކުރަން ކޮންމެ އަހަރަކު ކީ ނަމަވެސް އެކަން ކުރާ މަންޒަރު ނުފެންނަ ކަމަށެވެ.