ރަނގަޅު ގޮތަކީ ސޯލިހާއި އަޅުގަނޑު 2028 ގައި ވާދަނުކޮށް އެހެން ކެންޑިޑޭޓެއްގެ ފަހަތަށް އެރުން: ނަޝީދު
އަދަދު
25 ނޮވެމްބަރު 2025 | އަންގާރަ | 12:54
ދިވެހިރާއްޖެއަށާއި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް އެންމެ ރަނގަޅު ގޮތަކީ 2028 ވަނަ އަހަރުގެ އޮންނަ ރިޔާސީ އިންތިހާބުގައި ކުރީގެ ރައީސް އިބްރާހިމް މުހައްމަދު ސޯލިހާއި އެމަނިކުފާނު ވާދަނުކޮށް އެހެން ކެންޑިޑޭޓެއްގެ ފަހަތަށް އެރުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރާއްޖޭގެ އެންމެ ގިނަ ދުވަސްވީ ޕާޓީގެ ތެރޭގައި ރިޔާސީ ޓިކެޓުގެ ބަހުސް އަލުން ފެށިފައި މިވަނީ އެ ޕާޓީގެ ޗެއާޕާސަންކަމުން ފައްޔާޒު އިސްމާއީލް އިސްތިއުފާ ދެއްވުމުންނެވެ. އޭނާގެ އިސްތިއުފާ ސިޓީގައި ވަނީ ދެ ރައީސުންގެ މެދުގައި އޮތް ނުތަނަވަސްކަން ހައްލުކުރުމަށް ޗެއާޕާސަންގެ ހައިސިއްޔަތުން ކުރެއްވި ބައެއް ކަންކަން ހާމަކުރައްވައިފަ އެވެ.
"އަޅުގަނޑު ކުރިމަތި ނުލައި ރައީސް ސޯލިހުއަށް ފުރުސަތު ދިނުމަށް ދެ ފަހަރު މަސައްކަތް ކުރިން. ރައީސް ސޯލިހުގެ ބައެއް އަރިސް ބޭފުޅުންނަށާއި ރައީސް ސޯލިހުއަށް އެ ގޮތް ކަމުނުގޮސް، އަޅުގަނޑުމެން ނުލާ އިންތިހާބު ކާމިޔާބުވާނެ ކަމަށް މާ ބޮޑަށް ދެކެވި މުޅި ކަން ހަރާބުވެގެން ދިޔައީ،" އެމްޑީޕީގެ ގައުމީ މަޖިލީހުގެ އެހަރާއި މިހާރުގެ މެންބަރުން ތިއްބަވާ ގްރޫޕެއްގައި ނަޝީދު އިއްޔެ ލިޔުއްވި އެވެ.