ލަންކާއަށްފަހު ތޫފާން އިންޑިއާއާ ދިމާލަށް، މެޓުން ބުނަނީ ކުރިއަށް އޮތް 24 ގަޑިއިރު ވެސް ރާއްޖެއަށް ވިއްސާރަކުރާނެ ކަމަށް
އަދަދު
29 ނޮވެމްބަރު 2025 | ހޮނިހިރު | 2:22
މިދިޔަ ހަފުތާއިން ފެށިގެން އަވަށްޓެރި ސްރީލަންކާއަށް އަރައި ބޮޑެތި ގެއްލުންތަކެއް ދެމުން އަންނަ ތޫފާން ޑިޓުވާ އިންޑިއާ އާ ދިމާލަށް މިސްރާބު ޖަހާފައިވާއިރު، ކުރިއަށް އޮތް 24 ގަޑިއިރު ވެސް މި ތޫފާނުގެ ސަބަބުން ރާއްޖެއަށް ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ (މެޓް އޮފީސް) އިން ބުނެފި އެވެ.
މެޓުން މިއަދު އާންމުކުރި މައުލޫމާތުގައި ބުނީ ތޫފާން ޑިޓުވާ މިވަގުތު ހުރީ ރާއްޖޭގެ އެންމެ އުތުރު ރަށް ކަމަށްވާ ހއ. ތުރާކުނުގެ އިރުއުތުރުން ގާތްގަނޑަކަށް 875 ކިލޯމީޓަރު ދުރުގައި ކަމަށެވެ. ތޫފާން ދަތުރުކުރާނެ ކަމަށް ބެލެވެނީ އުތުރުހުޅަނގަށް ރާއްޖެއާއި ދުރަށް ކަމަށް ވެސް އެ އިދާރާއިން ލަފާކޮށްފައިވެ އެވެ.
މިގޮތަށް ދަތުރުކޮށް މާދަމާ ހެނދުނު އިންޑިއާގެ ތަމިލްނާޑޫ، ޕޫޑޫޗެރީ، އަދި އަންދްރަޕްރަދޭޝްގެ އައްސޭރި ފަށަށް މި ތޫފާން އަރާނެ ކަމަށް ވެސް މެޓުން އާންމުކުރި މައުލޫމާތުގައި ބުނެފައިވެ އެވެ.