ފެނެކައިގެ ބްލޭޒަން ކޮރަޕްޝަނުގައި ހިމެނޭ ދީނާގެ މައްޗަށް ކޮރަޕްޝަނުގެ އިތުރު ދައުވާއެއް
އަދަދު
2 ޑިސެމްބަރު 2025 | އަންގާރަ | 2:57
ފެނަކަ ކޯޕަރޭޝަނަށް ސީސީޓީވީތަކެއް ހޯދަން މަސައްކަތް ހަވާލުކުރި ކުންފުނިން މުދާ ހަމައަށް ނުލިބެނީސް ފައިސާ ދޫކުރި މައްސަލައެއްގައި ފެނަކައިގެ ކުރީގެ ޕްރޮކިޔުމަންޓު ހެޑު މަރިޔަމް ދީނާ ސާލިހުގެ މައްޗަށް ދައުވާ ކުރަން ކްރިމިނަލް ކޯޓަށް ފޮނުވައިފި އެވެ.
ޕްރޮސިކިޔުޓާ ޖެނެރަލް (ޕީޖީ) އޮފީހުން ބުނި ގޮތުގައި، މި މައްސަލައިގައި ދީނާގެ އިތުރުން ދައުވާކުރަނީ، އޭރު އެ ކުންފުނީގެ އިންފޮމޭޝަން ޓެކްނޮލޮޖީ ޑިޕާޓުމަންޓުގެ ހެޑަކަށް ހުރި އިސްމާއިލް ޝަމްއޫންގެ މައްޗަށެވެ. މި ދެ މީހުންގެ މައްޗަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އެވެ.
މި މައްސަލައިގައި ހިމެނޭ ޕްރޮކިޔުމަންޓު އެއްބަސްވުމުގައި ހިމެނޭ އަމިލައް ކުންފުންޏަކީ ކެއިރެޓްސޫ ކިޔާ ކުންފުންޏެކެވެ. ޖޫން 25، 2018 ގައި ސޮއިކުރި މި އެއްބަސްވުމުގެ ދަށުން ހަވާލުކުރީ ފެނަކައިގެ ހުރިހާ ބްރާންޗެއްގައި ސެކިއުރިޓީ ކެމެރާ ސިސްޓަމަކާއި، އެ ކުންފުނީގެ ހެޑް އޮފީހުގައި ކޮމާންޑް ސެންޓަރަކާއި ވީޑިއޯ ކޮންފަރެންސިން ސިސްޓަމް ގާއިމުކުރުމުގެ މަސައްކަތެވެ.