ވިޔަފާރިވެރިންނަށް ފައިސާ ދިނުމަށް އަނެއްކާވެސް އާ ތާރީހެއް، ފަސްކުރަމުން ގޮސް މިފަހަރު ރޯދަ މަހަށް!
އަދަދު
18 ޑިސެމްބަރު 2025 | ބުރާސްފަތި | 7:32
ސަރުކާރުން ވިޔަފާރިވެރިންނަށް ދައްކަންޖެހޭ ފައިސާ ދެއްކުމުގެ ތާރީހުތައް އެކި ފަހަރުމަތިން ބަދަލުކުރުމަށްފަހު، އެ ފައިސާ ދައްކާނެ އާ ތާރީހެއް ރައީސް މުހައްމަދު މުއިއްޒު އަނެއްކާވެސް ދެއްވައިފި އެވެ.
ކުދި އަދި މެދު ފަންތީގެ ވިޔަފާރިވެރިންނާ ބައްދަލުކުރެއްވުމަށް ރޭ ޒުވާނުންގެ މަރުކަޒުގައި ބޭއްވި ބައްދަލުވުމުގައި މުއިއްޒު ވިދާޅުވީ، ވިޔަފާރިވެރިންގެ އެންމެ ބޮޑު ކަންބޮޑުވުމަކީ ނުދެއްކި ހުރި ބިލްތައް ކަމަށެވެ. އެހެންކަމުން، "މި މަސް ނިމޭއިރަށް ވީހާވެސް ގިނަ ބިލްތަކެއް ކްލިއާ ކުރުމަށް" މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.
ސަރުކާރުން ކުންފުނިތަކަށް ފައިސާ ނުދެއްކި ހުރުމުގެ ސަބަބުން، ކުންފުނިތަކުން ދައްކަންޖެހޭ ޓެކްސްއަށް އެ ފައިސާ މުގާބިލުކޮށް (ސެޓް-އޯފް ކޮށް) ހަމަޖެއްސުމަށް މަސައްކަތް ކުރައްވާނެ ކަމަށްވެސް މުއިއްޒު ވިދާޅުވިއެވެ.