އެފްއޭއެމް މައްސަލައިގައި އަމީން ކޮންސްޓްރަކްޝަންގެ މައްޗަށް ކުށް ސާބިތުނުވި މައްސަލަ އިސްތިއުނާފު ކުރަނީ
އަދަދު
6 ޖެނުއަރީ 2026 | އަންގާރަ | 3:44
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއަށް ހިޔާނަތްތެރިވި މައްސަލައިގައި އަމީން ކޮންސްޓްރަކްޝަން ޕްރައިވެޓް ލިމިޓެޑްގެ މައްޗަށް އުފުލި މަނީ ލޯންޑާ ކުރުމަށް އެހީތެރިވުމުގެ ކުށުގެ ދައުވާ ސާބިތު ނުވާ ކަމަށް މިއަދު ކަނޑައެޅުމުން އެ މައްސަލަ އިސްތިއުނާފު ކުރަން ޕްރޮސެކިއުޓާ ޖެނެރަލް (ޕީޖީ) އިން ނިންމައިފި އެވެ.
އަމީން ކޮންސްޓްރަކްޝަން ހިމެނޭ މުއާމަލާތާ ގުޅިގެން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް ކުރި މަނީ ލޯންޑްރިންގެ ދައުވާ ވަނީ ސާބިތުވާ ކަމަށް ހުކުމްކޮށްފަ އެވެ. އެ މައްސަލައިގައި އޭނާގެ މައްޗަށް އިއްވާފައިވަނީ ޖުމްލަ 23 އަހަރުގެ ޖަލު ހުކުމެކެވެ.
ޕީޖީން ބުނީ އަމީން ކޮންސްޓްރަކްޝަން ހިމެނޭ މުއާމަލާތުގައި ބައްސާމްގެ މައްޗަށް ކުށް ސާބިތުވެފައިވާއިރު، އެ މުއާމަލާތާ ގުޅިގެން އަމީންގެ މައްޗަށް ދައުވާ ސާބިތުނުވާ ކަމަށް ކްރިމިނަލް ކޯޓުން ހުކުމްކުރީ ޝަރުއީ އަދި ގާނޫނީ އުސޫލުތަކާ ހިލާފަށް ކަމަށެވެ.