ސޯޝަލް މީޑިއާ ހުއްޓުވުމުގެ މަސައްކަތް ކޮންޓްރޯލް ކޮމިޝަނުން ފަށައިފި: އެމްޖޭއޭ
އަދަދު
25 ޖެނުއަރީ 2026 | އާދިއްތަ | 5:51
އަދަދު ނޫހުގެ ފޭސްބުކް ޕޭޖާއި އެކްސް އެކައުންޓުގައި ޝާއިއުކުރި "ސިޔާސީ ކާޓޫން" ގެ ވޮލިއުމް 22 އެއްވެސް މީހަކު ދައުރު ނުކުރަން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން އެންގި އެންގުމުން ސޯޝަލް މީޑިއާ ހުއްޓުވުމުގެ މަސައްކަތް އެ ކޮމިޝަނުން ފަށާފައިވާކަން ސާބިތުވާ ކަމަށް މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) އިން ބުނެފި އެވެ.
ކޮމިޝަނުން ނެރުނު އިއުލާނެއްގައި ބުނީ މި ނޫހުން މިދިޔަ ބުރާސްފަތި ދުވަހު ގެނެސްދިން ކާޓޫނަކީ ކޮމިޝަނުން ބަލަމުންދާ މައްސަލައަކާ ގުޅިގެން ނެގުމަށް އަންގާފައިވާ ކާޓޫނަކަށްވާތީ، އެ ކާޓޫނު އެއްވެސް މީހަކު ދައުރު ނުކުރުމަށް އަންގާ ކަމަށެވެ.
އެ އިއުލާން ޑިލީޓު ކުރުމަށް ފަހު އަލުން ޕޯސްޓު ކުރުމަށް ފަހު އަނެއްކާ މިހާރު ވަނީ އެ ކޮމިޝަނުގެ ސޯޝަލް މީޑިއާ ޕްލެޓްފޯމްތަކުން ނަގާފަ އެވެ. ގެޒެޓުގައި ކުރި އިއުލާން ވެސް ނެގުމަށް ފަހު އަލުން ވަނީ ޕޯސްޓުކޮށްފަ އެވެ.