ކަސްޓަމްސް މުވައްޒަފުންގެ އެކައުންޓަށް އޮޅުވާލައިގެން ފައިސާ ޖަމާކޮށް ނެގުމުން ސަސްޕެންޑުކޮށްފި
އަދަދު
3 ފެބްރުއަރީ 2026 | އަންގާރަ | 1:22
ކަސްޓަމްސް ސާވިސްގެ މުވައްޒަފުންގެ އެކައުންޓަށް އޮޅުވާލައިގެން ގިނަ އަދަދެއްގެ ފައިސާ ޖަމާކޮށް ނެގި މުވައްޒަފަކު ރޭ ސަސްޕެންޑުކޮށްފި އެވެ.
އަދަދު އަށް އެނގިފައިވާ ގޮތުގައި ސަސްޕެންޑުކުރީ ކަސްޓަމުގައި ވަޒީފާ އަދާކުރަމުންދިޔަ ގއ. ވިލިނގިއްޔަށް ނިސްބަތްވާ އިސްމާއިލް އިމާން އިބްރާހިމް އެވެ. އޭނާއަކީ ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކޮށްގެން ހޯދާ ފައިސާ ލޯންޑާ ކުރާ ނެޓްވޯކެއްގެ މައްސަލާގައި ހިމެނޭ އަހްމަދު އަނާމް އިބްރާހިމްގެ ކޮއްކޮ އެވެ.
އެކަމުގެ މައުލޫމާތު އެނގޭ މީހަކު މި ނޫހަށް ބުނީ ކަސްޓަމްސްގެ މުވައްޒަފުންނަށް އިމާން ފައިސާ ޖަމާކޮށް ނެގީ އޭނާގެ އެކައުންޓުގައި މައްސަލަ ޖެހިފައިވާ ކަމަށް ބުނެ ކަމަށާއި އޭނާ އެކި މުވައްޒަފުންނަށް ފައިސާ ފޮނުވިކަން އެނގުނީ އަނާމް ހައްޔަރުކުރި ފަހުން ކަމަށެވެ.