ދެ އިންތިހާބު އެއްކޮށްލަން ހުށަހަޅާ ބިލު ސަރުކާރުން ފޮނުވި ގޮތަށް މަޖިލީހުން ފާސްކޮށްފި
އަދަދު
10 ފެބްރުއަރީ 2026 | އަންގާރަ | 10:55
ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލައި، މިހާރު ހިނގަމުންދާ މަޖިލީހުގެ ދައުރު ކުރު ކުރުމަށް ގާނޫނުއަސާސީ ބަދަލުކުރުމަށް ސަރުކާރުގެ ފަރާތުން މަޖިލީހަށް ހުށަހެޅި ބިލު އެއްވެސް ބަދަލެއް ނުގެނެސް މަޖިލީހުން ފާސްކޮށްފި އެވެ.
މިއަދު ނެގި ވޯޓުގައި އެ ބިލު ފާސްކުރީ 72 މެންބަރުންގެ ވޯޓާއެކު އެވެ. ރިޔާސަތުން ވެސް މި ވޯޓުގައި ބައިވެރިވި އެވެ.
އެ ބިލާ ދެކޮޅަށް ވޯޓު ދިނީ އެންމެ މެންބަރެކެވެ. އެއީ އައްޑޫ މީދޫ ދާއިރާގެ މެންބަރު އަބްދުއްރަހުމާން އެވެ. މަޖިލީހުގެ ތަޅުމުގައި އިހުތިޖާޖު ކުރުމުން އެމްޑީޕީގެ ހަތަރު މެންބަރެއްގެ ނަން އިއްވައި ތަޅުމުން ނެރެފައިވާތީ އެ ޕާޓީން ވަނީ ވޯޓު ބޮއިކޮޓުކޮށްފަ އެވެ.