ސަރުކާރު އޮތީ "ބުއްދި ފިލާފައިވާ" ހާލަތެއްގައި، މިއީ ގައުމީ މުސީބާތެއް: އާޒިމް
އަދަދު
13 ފެބްރުއަރީ 2026 | ހުކުރު | 3:52
ރައީސް މުހައްމަދު މުއިއްޒުގެ ސަރުކާރުގެ ހާލަތަކީ އަމިއްލަ ސިކުނޑީގެ މައްޗަށް ބާރު ނުހިންގޭ، "މޮޔަވެފައިވާ" ބައެއްގެ ހާލަތު ކަމަށް ސިފަކުރައްވައި، މާލެ ސިޓީގެ މޭޔަރު އާދަމް އާޒިމް ވަރަށް ބޮޑަށް ފާޑުވިދާޅުވެއްޖެއެވެ.
އޭޕްރީލް 4 ގައި ބާއްވާ ލޯކަލް ކައުންސިލްތަކުގެ އިންތިހާބުގެ އެމްޑީޕީގެ ކެމްޕޭން ފެށުމަށް މިރޭ ބޭއްވި ޖަލްސާގައި އާޒިމް ވިދާޅުވީ، އިންސާނާއަށް އޭނާގެ އަމިއްލަ ސިކުނޑީގެ މައްޗަށް ބާރު ނުހިންގޭނަމަ ކުރެވޭނުކުރެވޭ ކަމެއް ނޭނގި އަތުންފައިން ގޯސް ހެދޭނެ ކަމަށާއި، މިއަދުގެ ސަރުކާރުން ފެންނަނީ އެފަދަ ހާލަތެއް ކަމަށެވެ.
ކުރިއަށް އޮތް ކައުންސިލް އިންތިހާބުގައި ސަރުކާރަށް އެއްވެސް ގޮނޑިއެއް ނުދިނުމަށް ގޮވާލައްވަމުން އާޒިމް ވިދާޅުވީ، ގައުމު މިހާރު އޮތް "މުސީބާތުން" ސަލާމަތް ކުރެވޭނީ އެމްޑީޕީއަށް ވޯޓު ދީގެން ކަމަށެވެ.