ދައުވާކޮށްގެން ނުހުއްޓުވޭނެ، ރިފަރެންޑަމްގައި މުއިއްޒަށް ރައްޔިތުން 'ނޫނެކޭ' ބުނާނެ: މައުރޫފް ޒާކިރު
އަދަދު
28 ފެބްރުއަރީ 2026 | ހޮނިހިރު | 9:58
ފުލުހުންގެ ވާޖިބަށް ހުރަސްއެޅި ކަމުގެ ތުހުމަތުގައި އޭނާގެ މައްޗަށް ދައުވާކުރަން ފޮނުވި ނަމަވެސް ލޯކަލް ކައުންސިލް އިންތިހާބުގެ ކެމްޕޭން ނުހުއްޓުވޭނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ވިދާޅުވެއްޖެ އެވެ.
ނިމިދިޔަ 2025 ވަނަ އަހަރުގެ އޮކްޓޯބަރު މަހުގެ 3 ވަނަ ދުވަހުގެ ރޭ މާލޭގައި އެމްޑީޕީން ބޭއްވި ބޮޑު މުޒާހަރާ ގުޅިގެން އެ މުޒާހަރާގައި ބައިވެރިވި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ހިމެނޭހެން ތިން މީހެއްގެ މައްޗަށް ދައުވާކުރުމަށް ޕްރޮސިކިއުޓަ ޖެނެރަލް (ޕީޖީ) ގެ އޮފީހަށް ފުލުހުން ވަނީ ފޮނުވައިފަ އެވެ.
މައުރޫފް ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، އޭނާގެ މައްޗަށް ދައުވާކުރަން ފޮނުވި ނަމަވެސް، ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕޭނަށް އެއްވެސް ހުރަހެއް ނޭޅޭނެ ކަމަށެވެ. ދައުވާކުރަން ފޮނުވިކަން އިއްޔެ އެންގިއިރު ވެސް އޭނާ ހުންނެވީ ކެމްޕޭނުގައި ތ. އަތޮޅުގަ އެވެ.