ކާންދޭން ބޭނުންކުރާ ހޮޅިކޮޅެއް ސަރުކާރަށް ނުގެނެވި ތުއްތު ކުއްޖަކު ނިޔާވެއްޖެ
އަދަދު
26 މާރިޗު 2026 | ބުރާސްފަތި | 1:54
ކާންދޭން ބޭނުންކުރާ ހޮޅިކޮޅެއް ސަރުކާރަށް ނުގެނެވި "ކުއަޑްރިޕްލެޖިކް ސްޕާސްޓިކް ސެރެބްރަލް ޕަލްސީ" ބައްޔަށް ފަރުވާ ހޯދަމުންދިޔަ ހަ އަހަރުގެ މ. ޗީޒް، އިބްރާހިމް އަޒާން ސުހައިލް އިއްޔެ ނިޔާވެއްޖެ އެވެ.
އަޒާންގެ މަންމަ އާމިނަތު ޔަޝްފާ މާޗު 16، ގައި ފޭސްބުކް ގައި ކުރި ޕޯސްޓެއްގައި އޭނާގެ ދަރިފުޅަށް ބޭނުންވާ ހޮޅިކޮޅު ހޯދުމަށް އެސްޓީއޯގައި އެދުނުތާ އަށް މަސް ވެގެންދިޔައިރުވެސް ހަބަރެއް ނުވާ ކަމަށް ބުނެ ކަންބޮޑުވުންތައް ހާމަކޮށްފައިވެ އެވެ.
"ދަރިފުޅަށް ކާން ދެނީ ޕެގް ޓިއުބަކުން. މިދިޔަ އަހަރު ދެ ޕެގް ޓިއުބް ހޯދަން އެސްޓީއޯއިން އޯޑަރުކުރިން. އަދިވެސް ނުލިބޭ. މިހާރު އަށް މަސްވީ. އެސްޓީއޯއަށް ގުޅައި، ހުޅުމާލޭގެ އެސްޓީއޯ ފާމަސީއަށް އެތައް ފަހަރެއްގެ މަތިން ދެވިއްޖެ. މިހާރު ޕެގް ޓިއުބް ކޮންމެހެންވެސް ބަދަލުކުރަން އެބަ ޖެހޭ. އަހަރެން މިހުރީ ގޮތް ހުސްވެފައި. އެއްވެސް ފާމަސީއަކުން ނުލިބޭ،" ޔަޝްފާ މާޗު 16، ގައި ބުންޏެވެ.