އެކަނި ދަރިން ބަލަހައްޓާ މައިންނަށް ނުވަތަ ބަފައިންނަށް ދައުލަތުން ދޭ މާލީ އެހީގެ ގޮތުގައި މަހަކު އެންމެ ގިނަވެގެން ދެވޭނީ 12،000 ރުފިޔާ ކަމަށް ކަނޑައަޅައި އެކަނި ދަރިން ބަލަހައްޓާ މައިން ނުވަތަ ބަފައިންނަށް މާލީ އެހީ ދިނުމާބެހޭ ގަވާއިދަށް މިއަދު އަލުން އިސްލާހު ގެނެސްފި އެވެ.

ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން މި އިސްލާހު ގެނައީ ހަތަރު ކުދިންނާ ހަމައަށް ކޮންމެ ކުއްޖަކަށް 3,000 ރުފިޔާގެ މަގުން މާލީ އެހީ އަދި ހަތަރު ކުދިންނަށްވުރެ ގިނައިން ކުދިން ތިބޭނަމަ، އިތުރުވާ ކޮންމެ ކުއްޖަކަށް މަހަކު 1,000 ރުފިޔާގެ އެލަވެންސަކާއެކު މަހަކު 15،000 ރުފިޔާއާ ހަމައަށް އިނާޔަތް ލިބޭ ގޮތަށް އެ ގަވާއިދަށް އިއްޔެ އިސްލާހެއް ގެނައުމަށްފަހު އެވެ. ގަވާއިދަށް މިއަދު ގެނައި އިސްލާހުގައިވާ ގޮތުން ގަވާއިދުގެ ދަށުން ޝަރުތު ހަމަވެގެން އެހީ ހަމަޖެހޭ އެކަނި ދަރިން ބަލަހައްޓާ މައިންނަށް ނުވަތަ ބަފައިންނަށް މާލީ އެހީގެ ގޮތުގައި މަހަކު ލިބޭނީ ހަތަރު ކުރިންނާ ހަމައަށް ކޮންމެ ކުއްޖަކަށް 3،000 ރުފިޔާ އެވެ. އަދި މަހަކު އެންމެ ގިނަވެގެން ދެވޭނީ 12،000 ރުފިޔާ ކަމަށާއި އަހަރަކު ލިބޭނީ ގިނަވެގެން 144،000 ރުފިޔާ ކަމަށް އިސްލާހުގައިވެ އެވެ. މި ބަދަލަށް އަމަލުކުރަން ފަށާނީ އަންނަ ޖެނުއަރީ ފުރަތަމަ ދުވަހުން ފެށިގެން ކަމަށް އިސްލާހުގައިވެ އެވެ. އެކަނި ދަރިން ބަލަހައްޓާ މައިންނަށް ނުވަތަ ބަފައިންނަށް ދައުލަތުން ދޭ މާލީ އެހީގެ ގޮތުގައި މީގެ ކުރިން އިނާޔަތުގެ ގޮތުގައި ދެމުން އައީ މަހަކު ކޮންމެ ކުއްޖަކަށް 1،000ރ. އެވެ. އަދި އެހީގެ ގޮތުގައި އެންމެ ގިނަވެގެން ދޫކުރަމުން އައީ މަހަކު 10,000 ރުފިޔާ އެވެ.

މައުޟޫޢުތަށް