ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުން ރަނގަޅު ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިހެން ވިދާޅުވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ގާނޫނުއަސާސީއަށް ގެންނަންޖެހޭ އިސްލާހުގެ ބިލް ރައްޔިތުންގެ މަޖިލީހަށް ހުށަހެޅުމުންނެވެ. ސަރުކާރުގެ ފަރާތުން ގާނޫނުއަސާސީއަށް މި އިސްލާހުތައް ހުށަހެޅުއްވީ ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހީމް ފަލާހް އެވެ. "ރިޔާސީ އިންތިހާބާއި މަޖިލިސް އިންތިހާބު އެކީގައި ބޭއްވުން އެއީ ރަނގަޅު ގޮތެއްކަމުގައި އަޅުގަނޑު ދެކެން،" ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވި އެވެ.

އިސްލާހުގައި ބުނީ ރައްޔިތުންގެ މަޖިލީހުގެ އިންތިހާބު ބާއްވާނީ ރިޔާސީ އިންތިހާބާއެކު ކަމަށެވެ. ރައްޔިތުންގެ މަޖިލީހުގެ އުމުރަކީ ޑިސެމްބަރު 1 ވަނަ ދުވަހުން ފެށިގެން ފަސް އަހަރު ކަމަށާއި އެ މުއްދަތު ހަމަވުމުން މަޖިލިސް އުވުނީ ކަމަށްވެސް އިސްލާހުގައިވެ އެވެ. އިސްލާހުގައިވާ ގޮތުން ހިނގަމުންދާ ރައްޔިތުންގެ މަޖިލީހުގެ އުމުރު ހަމަވެގެން މަޖިލިސް އުވުމާއެކު އަލަށް އިންތިހާބުކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވާނީ ޑިސެމްބަރު މަހުގެ 1 ވަނަ ދުވަހު އެވެ. މި ގާނޫނަށް އަމަލުކުރަން ފަށާއިރު ހިނގަމުންދާ ރައްޔިތުންގެ މަޖިލީހުގެ އުމުރު ޑިސެމްބަރު 1، 2028 އަށް ހަަމަވާނެ ކަމަށްވެސް އިސްލާހުގައިވެ އެވެ. އިސްލާހާ ގުޅިގެން މަޖިލީހުގެ މެންބަރުން ހޮވުމަށްޓަކައި ގާނޫނަށް އަމަލުކުރަން ފެށުމަށްފަހު ދެން އެންމެ އަވަހަށް ބާއްވަންޖެހޭ އިންތިހާބު ގާނޫނާ އެއްގޮތްވާ ގޮތުގެ މަތިން ބާއްވައި އެ މަގާމުތަކަށް މީހުން އިންތިހާބުކުރުމާ ގުޅޭ ގޮތުން ކުރަންޖެހޭ ހުރިހާ ކަމެއް ޑިސެމްބަރު 1، 2028 ގެ ކުރިންކޮށް ނިންމައި އެ ތާރީހުގައި އަލަށް އިންތިހާބުކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަންވާނެ ކަމަށްވެސް އިސްލާހުގައިވެ އެވެ.

މައުޟޫޢުތަށް