މާތް ﷲ ރުއްސުންލެއްވި އަބޫހުރައިރާގެފާނުގެ ކިބައިން ރިވާ ކުރެވިގެން ވެ އެވެ. މާތް ނަބިއްޔާ ﷺ ހަދީސް ކުރެއްވި އެވެ. "ބަފަޔަކު އޭނާގެ ދަރިފުޅު ހެޔޮގޮތުގައި އަދަބުވެރި ކުރުވުމަށް ވުރެ މަތިވެރި ހަދިޔާ އެއް އެ ދަރިޔަކަށް ނުދެވޭނެ އެވެ." (އައްތިރުމިޛީ).

މި ހަދީސްގައި މާތް ނަބިއްޔާ ﷺ ބަޔާން ކުރައްވަނީ މައިންބަފައިން އެ މީހުންގެ ދަރިންނަށް މުދަލެއް ނުވަތަ އެ ނޫން އެއްޗެއް ވެސް ހަދިޔާ ކުރަން ނުވަތަ ހިބައިން ދޭން ބަލާ ނަމަ ދެވޭނެ އެންމެ އަގުބޮޑު އަދި އެންމެ މަތިވެރި ހަދިޔާ އަކީ ހެޔޮ ގޮތުގައި އެ ދަރިން ތަރުބިޔަތު ކުރުން ކަމަށެވެ. ވަކިން ޚާއްސަކޮށް ރިވެތި އަހުލާގާ ވެރިންނަށް އެ ދަރިން ހެދުމެވެ. އެހެންކަމުން މާއްދީ ގޮތުން ކިތަންމެ އަގުބޮޑު އެއްޗެއް ދަރިންނަށް ދިނަސް ނުވަތަ އިލްމުގެ ގޮތުން ކިތަންމެ މަތީ ދަރަޖައަކަށް ދިޔަސް ރިވެތި އަހުލާގާ އަޅާ ބަލާއިރު މިއިން އެއްވެސް އެއްޗެއްގެ އަގު މަތިނުވާނެ އެވެ.

ހެޔޮގޮތުގައި އަދަބުވެރި ކުރުވުމޭ ބުނާ ބަހުގެ މުރާދަކީ ރިވެތި އަހުލާގުގެ މަތީ ހެޔޮގޮތުގައި ތަރުބިޔަތު ކުރުމެވެ. ދަރިން އަދަބުވެރި ކުރުވުމަށްޓަކައި އެންމެ ފުރަތަމަ ﷲ އާ އެކު ދަރިފުޅު އަދަބުވެރި ވާން ދަސްކޮށްދޭން ޖެހޭނެ އެވެ. އެބަހީ ﷲ ގެ އަމުރުފުޅުތަކަށް ކިޔަމަންވެ ނަހީތަކުން ދުރުހެލިވެ ސިއްރާއި ފާޅުގައި ﷲ އަށް ތަގުވާވެރި ވުމެވެ.

މައުޟޫޢުތަށް