އެއާޕޯޓުގެ ޓެކްސީ ކިއު ކާގޯ ޓާމިނަލް ކައިރިއަށް
މިހާރު
19 ޖުލައި 2025 | ހޮނިހިރު | 7:21
ވެލާނާ އިންޓަނޭޝަނަލް އެއާޕޯޓް (ވީއައިއޭ) އާ ޓާމިނަލް މި މަހުގެ 26 ހުޅުވުމުގެ ތައްޔާރީތަކާ ގުޅިގެން، އެއާޕޯޓުގެ ޓެކްސީ ކިއު ކުރީގެ ކާގޯ ޓާމިނަލް ކުރިމައްޗަށް މާދަމާ އިން ފެށިގެން ބަދަލުކުރަން އެމްއޭސީއެލް އިން ނިންމައިފި އެވެ.
އެ ކުންފުނިން ނެރުނު އިއުލާނެއްގައި ބުނީ، ހުޅުލޭގެ ދެކުނު ފަރާތުގައި މިހާރު އޮންނަ ކާރު ކިއު ޑޮމެސްޓިކް ޓާމިނަލް ކައިރީގައި އޮންނަ ކުރީގެ ކާގޯ ޓާމިނަލް ކުރިމައްޗަށް ބަދަލުކުުމާ އެކު، އެ ކިއު ބެލެހެއްޓުމުގެ ކަންކަން އެސްޓޭޓް ސެކިއުރިޓީ ސާވިސަސް (އީއެސްއެސް) އިން ކުރަމުން ގެންދާނެ ކަމަށެވެ.
އެމްއޭސީއެލް އިން ބުނީ، ޑޮމެސްޓިކް ޓާމިނަލް ކައިރިއަށް މާދަމާ އިން ފެށިގެން ކާރުތަކަށް މަޑު ނުކުރެވޭނެ ކަމަށެވެ. އޭގެ ބަދަލުގައި ޑޮމެސްޓިކް ޓާމިނަލަށް މީހުން ގޮވައިގެންދާ ކާރުތައް މަޑުކުރަން ޖެހޭނީ އިންޓަނޭޝަނަލް ޓާމިނަލަށް ދާ ކާރުތައް މަޑުކުރަން ހާއްސަ ކޮށްފައިވާ ސަރަހައްދަށް ކަމަށް ވެސް އެމްއޭސީއެލުން ބުންޏެވެ.