ނޯލަންގެ އާ ފިލްމަށް އަހަރެއް ކުރިން ޓިކެޓް ވިއްކަން ފަށައިފި
މިހާރު
20 ޖުލައި 2025 | އާދިއްތަ | 11:03
ހޮލީވުޑްގެ ކުޅަދާނަ ޑައިރެކްޓަރު ކްރިސްޓޮފާ ނޯލަންގެ އާ ފިލްމު "ދަ އޮޑެސީ" ޕްރިމިއާކުރުމުގެ އަހަރެއް ކުރިން ފިލްމަށް ޓިކެޓް ވިއްކަން ފަށައިފި އެވެ.
"ދަ އޮޑެސީ"ގެ މަންޒަރުތައް ނަގާ ނުނިމެނީސް އަދި ޕޯސްޓް ޕްރޮޑަކްޝަންގެ މަސައްކަތް ވެސް އެއްކޮށް ނުނިމެނީސް އެ ފިލްމަށް ޓިކެޓް ވިއްކަން ފެށީ މިދިޔަ ބުރާސްފަތި ދުވަހު އެވެ. އެ ފިލްމު ޕްރިމިއާކުރަނީ އަންނަ އަހަރު ޖުލައި 17 ގަ އެވެ.
އައިމެކްސް އިން ވަނީ ދުނިޔޭގެ އެކި ހިސާބުތަކުގައި ހުރި 26 ސިނަމާއަކުން އެ ފިލްމަށް ޓިކެޓް ވިއްކަން ބުކިންއަށް ހުޅުވާލައިފަ އެވެ. އެއީ މުޅިން ވެސް 1507 ފޯމެޓުގެ ސްކްރީންތައް ހުރި ސިނަމާތަކެވެ. އެއީ ފިލްމު އަޅުވަން މިހާރު ދުނިޔޭގައި ބޭނުންކުރާ އެންމެ ބޮޑެތި ސްކްރީންތަކެވެ.