ޔުނައިޓެޑުން އެމްބަމޯ ސޮއިކުރުވައިފި، އަދިވެސް އިތުރު ކުޅުންތެރިންނަށް ބިޑްކުރަނީ
މިހާރު
22 ޖުލައި 2025 | އަންގާރަ | 11:10
ދިގުދެމިގެންދިޔަ ޓްރާންސްފާގައި ބްރަޔަން އެމްބަމޯ އެންމެ ފަހުން މެންޗެސްޓާ ޔުނައިޓެޑަށް ސޮއިކޮށްފި އެވެ.
ކެމެރޫންގެ ފޯވާޑް ސޮއި ކުރުވަން ޔުނައިޓެޑުން ވަނީ އޭނާގެ ކުރީގެ ކްލަބް ބްރެންޓްފޯޑަށް 71 މިލިއަން ޑޮލަރު ދީފަ އެވެ. މީގެ ދެ ހަފުތާ ކުރިން ޔުނައިޓެޑާ އެކު އެއްބަސްވުމަކަށް ދިޔަ ފަހުން ބްރެންޓްފޯޑުން ޓްރާންސްފާގެ މަސައްކަތް މަޑުޖައްސާލި އެވެ.
ޔުނައިޓެޑްގެ ސަޕޯޓަރުން ތުހުމަތު ކުރަނީ ބްރެންޓްފޯޑުން ޔުނައިޓެޑްގެ ޑީލް އެހެން ކްލަބްތަކަށް ލީކު ކުރި ކަމަށެވެ. މިދިޔަ ހަތް އަހަރު ބްރެންޓްފޯޑަށް ކޯޗުކޮށް ދިން ޓޮޓްނަމް ހޮޓްސްޕާސްގެ މިހާރުގެ ކޯޗު ތޯމަސް ފްރޭންކަށް ވެސް ބްރެންޓްފޯޑުން އެ މައުލޫމާތު ފޯރުކޮށްދިންކަމުގެ ތުހުމަތު ޔުނައިޓެޑްގެ ސަޕޯޓަރުން ކުރި އެވެ.