ކުޑަކުޑަ ގައުމު އދ. އަށް، ދުނިޔެ އަށް ލިބުނީ ސިހުމެއް!
މިހާރު
26 ޖުލައި 2025 | ހޮނިހިރު | 10:07
ދުނިޔޭގެ ތާރީހަށް ބަލާއިރު، ރާއްޖެ އަށް މިނިވަންކަން ލިބުނު ގޮތް އެހެން ގިނަ ގައުމުތަކާ މިނެ ކިރެލާއިރު ތަފާތެވެ.
އަޅުވެތިކޮށްފައި ތިބި ބަޔަކާ ހަނގުރާމަކޮށް، ލޭއޮހުރުވުމަކަށްދާކަށް ނުޖެހުނެވެ. އިނގިރޭސިންގެ ހިމާޔަތުގެ ދަށުން 1965 ވަނަ އަހަރުގެ މި ދުވަހު، ރަސްމީކޮށް މިނިވަންވިއިރުވެސް، ދާހިލީ ކަންކަމާ އިނގިރޭސިން ބަސް ނުކިޔާތީ ދާހިލީ މިނިވަންކަން އޭރުވެސް އޮތީ ޒާތަކަށް ލިބިފަ އެވެ.
"މިނިވަންކަން އިޢްލާނު ކުރުމުގެ ބޮޑު އިޙްތިފާލެއް އޭރަކު ނުބޭއްވޭ. އަޅުގަނޑުމެން، އެ ޤައުމެއްގެ އަޅުވެތިކަމުގެ ދަށުގައި އޭރު އޮތް ޤައުމުގެ ދިދަ ތިރިކޮށް، އަޅުގަނޑުމެންގެ މިނިވަން ދިދަ އުފުލާލުމުގެ ރަސްމިއްޔާތެއް ވެސް ނުބޭއްވޭ. އަދި އަޅުގަނޑުމެންގެ ތެރެއިން ގިނަ ބަޔަކަށް، އެ މިނިވަންކަމުގެ ސަބަބުން އައި ބަދަލެއް އެވަގުތު ރަނގަޅަށް އިޙްސާސް ވެސް ނުކުރެވެޔޭވެސް ދެންނެވިދާނެ،" ނަވާސަތޭކަ ނުވަދިހަ ވަނަ އަހަރު، ރާއްޖެއަށް މިނިވަންކަން ލިބުނު ރިހިޔޫބީލް ފާހަގަކުރުމަށް ބޭއްވި ރަސްމީ ޖަލްސާގައި އޭރުގެ ރައީސް މައުމޫން އަބްދުލްގައްޔޫމް ވިދާޅުވެފައި ވެ އެވެ.