މަރުގެ އަދަބު ތަންފީޒު ކުރުމުގެ އިޖުރައާތު ގާނޫނުގައި ހިމަނައި، މި ދައުރުގައި އަމަލުކުރަން ފަށާނަން: އިހުސާން
މިހާރު
31 ޖުލައި 2025 | ބުރާސްފަތި | 6:11
މަރުގެ އަދަބު ތަންފީޒުކުރުމުގެ އިޖުރައާތު މިހާރު އޮތީ ގަވާއިދެއްގައި ކަމަށް ވާތީ އެކަމާ ބެހޭ އުސޫލުތައް ގާނޫނެއްގައި ހިމެނުމަށް ފަހު، އަމަލުކުރަން ފަށާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ރާއްޖެ އަށް މަސްތުވާތަކެތި އެތެރެކުރުން ނުވަތަ އޭގެ ވިޔަފާރިކުރުމުގެ ކުށް ސާބިތުވާ މީހުންނަށް މަރުގެ އަދަބު ދެވޭ ގޮތަށް، މަސްތުވާތަކެއްޗާ ބެހޭ ގާނޫނު އިސްލާހުކުރާނެ ކަން ރައީސް ޑރ. މުހައްމަދު މުއިއްޒު ރޭ ވަނީ އިއުލާން ކުރައްވައިފަ އެވެ.
އެއާއެކު، ގިނަ ބައެއްގެ ކަންބޮޑުވުމަކަށް ވީ، މިހާރު ވެސް މަރުގެ މައްސަލަތަކުގައި މަރަން ހުކުމް ކުރިޔަސް، އެ އަދަބު ތަންފީޒު ނުވާތީ އެވެ. އެހެންވެ، ޑްރަގުގެ ވިޔަފާރީގެ މައްސަލަ ހައްލުވާނެތޯ ގިނަ ބަޔަކު ވަނީ ސުވާލު އުފައްދައިފަ އެވެ.