ޔާމީންގެ ތުހުމަތުތައް އެފްއައިޔޫގެ ކުރީގެ ވެރިޔާ އަޝްރަފަށް!
މިހާރު
8 އޯގަސްޓު 2025 | ހުކުރު | 3:51
މަރުކަޒީ ބޭންކު، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔާގެ މަގާމުން މިދިޔަ ޖުލައި 31 ވަނަ ދުވަހު ވަކިކޮށް އެ ތަނުގެ އެހެން ޑިޕާޓްމަންޓަކަށް ބަދަލުކުރި އަބްދުﷲ އަޝްރަފަށް ކުރީގެ ރައީސް އަބްދުﷲ ޔާމީން ރޭ ވަރަށް ބޮޑަށް ފާޑުވިދާޅުވެއްޖެ އެވެ.
އެފްއައިޔޫގެ އިސްވެރިޔާގެ މަގާމުން އަޝްރަފް ވަކިކޮށް، މި މަހުގެ ތިން ވަނަ ދުވަހު ވަނީ އެ މަގާމަށް ޓެކްސް އެޕީލް ޓްރައިބިއުނަލްގެ މެމްބަރުގެ ގޮތުގައި ކުރިން ހުންނެވި އިސްމާއިލް ސާޖިދު އައްޔަންކޮށްފަ އެވެ. އެ ކަމަކު، އެ ނިންމުން އެމްއެމްއޭ އިން ނިންމީ ރައްޔިތުންގެ މަޖިލިހުގެ ބާރަށު ދާއިރާގެ މެމްބަރު އިބްރާހިމް ޝުޖާއުގެ ހިއްސާ އޮންނަ އޮފިޝަލް އިވެންޓްސް ކުންފުންޏާ ގުޅޭ މާލީ މުއާމަލާތްތަކާ ގުޅޭ ގޮތުން އެފްއައިޔޫ އިން ތައްޔާރުކޮށްފައިވާ ރިޕޯޓެއް ސޯޝަލް މީޑިއާގައި އާންމުވުމުގެ އެއް ދުވަސް ކުރިންނެވެ.
ނަމަވެސް، އެމްއެމްއޭ އިން ބުނެފައި ވަނީ އަޝްރަފް އެހެން ޑިޕާޓްމަންޓަކަށް ބަދަލުކުރުމާއި ޝުޖާއުއާ ގުޅޭ ރިޕޯޓު ބަޔަކު ލީކުކޮށްލުމާ ގުޅުމެއް ނެތް ކަމަށެވެ.