ލޯކަލް ޓޫރިޒަމް ފުޅާވަމުން އަންނަ ރަށްތަކުގައި ތާރު އަޅައިގެން މަގު ހަދަން ތާއީދެއް ނުކުރަން: ރައީސް
މިހާރު
11 އޯގަސްޓު 2025 | ހޯމަ | 1:42
ގެސްޓް ހައުސްތައް ގިނަ، ލޯކަލް ޓޫރިޒަމްގައި ކުރިއަރަމުން އަންނަ ރަށްތަކުގައި ތާރު އަޅައިގެން ނުވަތަ ގާ އަތުރައިގެން މަގު ހެދުމަކީ އެމަނިކުފާނު ވެސް ތާއީދު ކުރައްވާ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ބ. އަތޮޅުގެ 13 ރަށަކަށް ރައީސް މިއަދު ފެއްޓެވި ދަތުރުފުޅުގައި، ކަމަދުއަށް ވަޑައިގެން ރައްޔިތުންނާ އެކު ބޭއްވެވި ބައްދަލުވުމުގައި ރައީސް ވިދާޅުވީ ޓޫރިޒަމް ފުޅާވަމުން އަންނަ ރަށްތަކުގައި ގުދުރަތީ ރީތިކަން ދަމަހައްޓަން ޖެހޭ ކަަމަށެވެ. މަގުތައް ރަނގަޅު ފެންވަރަކަށް ހަދާއިރު ވެސް، ގުދުރަތީ ރީތިކަން ނުގެއްލޭނެ ގޮތަށް ޕްލޭންކުރަން ޖެހޭ ކަމަށް ރައީސް ވިދާޅުވި އެވެ.
ރައީސް ވިދާޅުވި ގޮތުގައި ހުރިހާ ރަށެއްގެ މަގުތައް ތާރު އަޅައިގެން ނޫނީ ގާ އަތުރައިގެން ހެދުމަކީ އެމަނިކުފާނު ތާއީދުކުރައްވާ ކަމެއް ނޫނެވެ. އަދި އެއީ، ހުރިހާ ރަށެއްގައި ރައްޔިތުން އެދޭނެ ގޮތެއް ވެސް ނޫން ކަމަށް ވިދާޅުވި އެވެ.