ޓޫރިޒަމް ފައްކާވެފައި އޮތް އަތޮޅަކަށް ހދ. ހެދުމުގެ މަސައްކަތް ފަށައިފިން: ރައީސް
މިހާރު
25 އޯގަސްޓު 2025 | ހޯމަ | 1:57
ހދ. އަތޮޅުން ރަށްތަކާއި ފަޅު ހިމެނޭހެން 10 ސަރަހައްދެއް ވަނީ ޓޫރިޒަމަށް ހުޅުވާލާފައި. ބޮޑެތި ލުއިތަކަކާ އެކު މިތަންތަން ދޫކުރަނީ މި އަތޮޅުގައި ޓޫރިޒަމް ފުޅާކުރަން.
ރާއްޖޭގައި ޓޫރިޒަމް ނެތް އަތޮޅެއްގެ ގޮތުގައި ހދ. އަތޮޅު ލޭބަލްވެފައި އޮތުން ކަނޑުވާލައި، ލޯކަލް ޓޫރިޒަމާ އެކު އިގްތިސާދީ ފުރުސަތުތައް ފަހި އަތޮޅަކަށް ހެދުމުގެ މަސައްކަތް މި ސަރުކާރުން ފަށާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ހދ. އަތޮޅުގެ ރަށްތަކަށް ކުރައްވާ ދަތުރުފުޅުގައި ނައިވާދޫގެ ރައްޔިތުންނާ ބައްދަލުކުރައްވައި ރައީސް ވިދާޅުވީ މި އަތޮޅުގައި ޓޫރިޒަމް ކުރިއަރުވަން ސަރުކާރުން ވަރަށް ބޮޑު އިސްކަމެއް ދޭ ކަމަށެވެ. އޭގެ ތެރޭގައި ރަށްރަށް ލޯކަލް ޓޫރިޒަމަށް ހުޅުވާލައި، އަތޮޅުގައި ޓޫރިޒަމް ފުޅާކުރުން ހިމެނޭ ކަމަށް ރައީސް ވިދާޅުވި އެވެ.