ސެންޓޭ އެނބުރި ނިއު ރޭޑިއަންޓަށް
މިހާރު
25 އޯގަސްޓު 2025 | ހޯމަ | 11:34
މިވަގުތު ދެ ވަނަ ޑިވިޝަނުގައި އޮތް އެކަމަކު ކުރިއަށް އޮތް ދިވެހި ޕްރިމިއާ ލީގުގައި ވާދަކުރާނެ ކަމަށް ވަރަށް ބޮޑަށް ބެލެވޭ ދިވެހި ފުޓްބޯޅައިގެ ގަދަބާރު ނިއު ރޭޑިއަންޓުން ކުޅަދާނަ ފޯވާޑް އަލީ ފާސިރު (ސެންޓޭ) ގެ ސޮއި ހޯދައިފަ އެވެ.
މިދިޔަ ދެ ސީޒަނުގައި މާޒިޔާ އަށް ކުޅުނު ސެންޓޭ ނިއުއާ ގުޅުނުކަން އެ ކްލަބުން ރަސްމީކޮށް ހާމަނުކުރި ނަމަވެސް، ނިއުގެ ޗެއާމަން އަހުމަދު މުބީން ވަނީ ސޯޝަލް މީޑިއާގައި "އަލީ ފާސިރު: ނަމްބަރު 10" ޖައްސަވައި، އެކަން ނުސީދާކޮށް ކަށަވަރުކޮށްދެއްވައިފަ އެވެ.
ލީގުގައި ހިމެނޭ ސުޕަ ޔުނައިޓެޑް ސްޕޯޓްސް (ސަސް) އިން މާލީ ހާލަތު ހުރި ގޮތުން މުބާރާތުން ވަކިވުމުން އެ ޖާގަ ލިބޭނީ، އެންމެ ފަހުގެ ދެ ވަނަ ޑިވިޝަނުގެ ސެމީ ފައިނަލުން ބަލިވި ނިއު ނުވަތަ ޓެންޓް ސްޕޯޓްސް އަށެވެ. އެފްއޭއެމްގެ އެކްސްކޯ އިން އެ ޖާގަ ދޭނީ ސެމީން ބަލިވި ދެ ޓީމުގެ ތެރެއިން އެންމެ މަދުން ބައިކޮޅަށް ގޯލު ވަން ޓީމަށް ކަމަށް ވާހަކަތައް ދެކެވެ އެވެ. އެ ހާލަތުގައި އެ ފުރުސަތު ލިބޭނީ ނިއު އަށެވެ.