މިހާރު ހުޅުމާލެ ސެންޓްރަލް ޕާކުގައި ކުރިއަށްދާ ފުޑް އެންޑް ހޮސްޕިޓާލިޓީ އޭޝިއާ މޯލްޑިވްސް (އެފްއެޗްއޭއެމް) ގައި "ދިލްމާ ނެޗުރަލް ލަގްޒަރީ ސޮމެލިއާ ޗެލެންޖު" ފަށައިފި އެވެ.

އިއްޔެ ފެށި މި ޗެލެންޖު މިއަދުގެ ހަވީރު 4:00 އާ ހަމައަށް ކުރިއަށް ދާނެ އެވެ. މިއީ ސިމްޑީ ގްރޫޕާއި ދިލްމާ ސިލޯން ޓީ ގުޅިގެން، "ސޮމެލިއާ" ޗެލެންޖެއް ރާއްޖޭގައި ބާއްވާ ފުރަތަމަ ފަހަރެވެ. އަދި މިއީ އެފްއެޗްއޭއެމްގައި ޓީމުތަކުން ބައިވެރިވާ ހަމައެކަނި ޗެލެންޖެވެ.

އެ ޗެލެންޖުގައި ވާދަކުރާ ކޮންމެ ޓީމެއްގައި މިކްސޮލޮޖިސްޓަކާއި ޝެފެއް ހިމެނޭނެ އެވެ. ކޮންމެ ޓީމަކުން ވެސް ތައްޔާރުކުރަން ޖެހޭނީ ދިލްމާ ސައިފަތުގެ ބުއިމަކާއި އެ ބުއިމެއްގެ ތަޖުރިބާއާ ގުޅޭ، އެ ތަޖުރިބާ ފުރިހަމަކޮށްދޭނެ ފޮނި ނުވަތަ ކުޅި ކާ އެއްޗެކެވެ. ޗެލެންޖުގައި ސައި ތައްޔާރުކުރަން ޖެހޭ ތިން ދާއިރާއެއް ވަނީ ކަނޑައަޅައިފަ އެވެ. އެއީ ހަމައެކަނި ސައިފަތުން ތައްޔާރުކުރާ ބުއިމަކާއި ކިރާއި ސައިފަތް ބޭނުންކޮށްގެން ތައްޔާރުކުރާ ބުއިމަކާއި ސައިފަތް ބޭނުންކޮށްގެން މޮކްޓެއިލެއް ތައްޔާރުކުރާ ކެޓަގަރީ އެކެވެ. މިއީ 30 މިނެޓުގެ ތެރޭގައި ފުރިހަމަ ކުރަން ޖެހޭ ޗެލެންޖެކެވެ.

މައުޟޫޢުތަށް