ތަމްރީނުތަކަށް ފަހު އައިތަނާ ހޭންޑްބޯޅައިގެ މޮޅު ކުޅުންތެރިޔާ ޔަޝްމު ގައުމީ ޓީމުން "ވަކިކޮށްފި"
މިހާރު
11 ސެޕްޓެމްބަރު 2025 | ބުރާސްފަތި | 1:55
މެލޭޝިއާގެ ތަމްރީނުތަކަށް ފަހު މާލެ އައި މުހައްމަދު ޔަޝްމު އަހުމަދު ހޭންޑްބޯޅަ ގައުމީ ޓީމުން އެކަހެރި ކޮށްފި އެވެ.
ސޯޝަލް މީޑިއާގައި ޔަޝްމު ބުނީ، މެލޭޝިއާގައި އޭނާ ތަމްރީނު ހެދީ ހޭންޑްބޯލް މޯލްޑިވްސްގެ ހުއްދައާ އެކު ކަމަށެވެ. ނަމަވެސް މާލެ އައި ތަނުން ފިޓްނަސް ޓެސްޓަ ހަދަން އޭނާ އަށް ގުޅި ކަމަށާއި އެކަމަކު އެ ޓެސްޓް ހަދަން ނުދިއުމުން އޭނާ ގައުމީ ޓީމު "ވަކިކޮށްފައިވާ" ކަމަށް ބުންޏެވެ.
"އަހަރެން މާލެ އަށް އައީ ވިސާގެ މުއްދަތު ހަމަވާތީ އެވެ. މާލެ އަށް އައިތާ މާގިނަ އިރެއް ނުވެ، އެސޯސިއޭޝަނުން އަހަންނަށް ގުޅައި، ބުނީ ޓެސްޓަކަށް އައުމަށެވެ. އަހަރެން ދަތުރުކޮށްފައި އައިތާ މާގިނަ އިރެއް ނުވާތީ، އެ ވަގުތު ޓެސްޓެއް ހަދަން ދާން އަހަންނަށް ފަސޭހައެއް ނޫނެވެ،" ސޯޝަލް މީޑިއާ ޕޯސްޓުގައި ޔަޝްމު ލިޔެފައި ވެ އެވެ.