ފ. ނިލަންދޫގައި އަޅަން ނިންމާފައިވާ އެއާޕޯޓުގެ މަސައްކަތް އެމްއޭސީއެލްއާ މިރޭ ހަވާލުކޮށް، މިއަދުން ފެށިގެން ކުރިއަށް އޮތް ދެ އަހަރާއި ބައިގެ ތެރޭގައި އެ ޕްރޮޖެކްޓް ނިންމަން ސަރުކާރުން ކަނޑައަޅައިފި އެވެ.

ރައީސް ޑރ. މުހައްމަދު މުއިއްޒު ފ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ ރަށުގެ ރައްޔިތުންނާ ބައްދަލުކުރައްވަން މިރޭ ބޭއްވި ޖަލްސާގައި އެއާޕޯޓު އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ. އެމްއޭސީއެލުން ސޮއިކުރެއްވީ މެނޭޖިން ޑިރެކްޓަރު އިބްރާހިމް ޝަރީފު މުހައްމަދެވެ.

ނިލަންދޫގެ ރައްޔިތުންނާ ވާހަކަފުޅު ދައްކަވަމުން ރައީސް މުއިއްޒު މިރޭ ވިދާޅުވީ، އެ ރަށުގެ އެއާޕޯޓު އަޅަން ބޭނުންވާ ގާތްގަނޑަކަށް 1،500 މީޓަރުގެ ދިގު ރަންވޭއަކަށް ބޭނުންވާ ވަރަށް މިހާރު އެމްޓީސީސީގެ ފަރާތުން ބިން ހިއްކައި ނިމެމުން އަންނަ ކަމަށެވެ. އަދި އިތުރު 300 މީޓަރަށް ބޭނުންވާ ސަރަހައްދު ހިއްކަން ވެސް އެ ކުންފުންޏާ މިހާރު ހަވާލު ކޮށްފައިވާ ކަމަށް އެ މަނިކުފާނު ވިދާޅުވި އެވެ.

މައުޟޫޢުތަށް