ޔުއާން އެކައުންޓް ތައާރަފްކުރުމުން ރާއްޖެ-ޗައިނާ އެފްޓީއޭ ކުރިއަރާނެ: ސަފީރު
މިހާރު
22 ސެޕްޓެމްބަރު 2025 | ހޯމަ | 4:09
ބޭންކް އޮފް މޯލްޑިވްސް (ބީއެމްއެލް) ގައި ޗައިނީޒް ޔުއާން އެކައުންޓް ހުޅުވުމުގެ ހިދުމަތްތައް ލިބޭ ގޮތް ހެދުމަކީ ރާއްޖެ އާއި ޗައިނާއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުން (އެފްޓީއޭ) އަށް ކުރިއެރުން ލިބޭނެ ކަމެއް ކަމަށް ރާއްޖޭގައި ހުންނަވާ ޗައިނާ ސަފީރު ކޮންގް ޝިއަންހުއާ ވިދާޅުވެއްޖެ އެވެ.
ބީއެމްއެލްގައި ޔުއާން އެކައުންޓް ހުޅުވުމުގެ ހިދުމަތާއި އެކައުންޓްތަކުން މުއާމަލާތްކުރަން ބޭނުންވާނެ އެެހެން ހިދުމަތްތައް ތައާރަފްކުރަން މިއަދު ބޭއްވި ރަސްމިއްޔާތުގައި ސަފީރު ވިދާޅުވީ ޔުއާން އެކައުންޓްތައް ހުޅުވޭ ގޮތް ވުމަކީ ދެ ގައުމުގެ ދެމެދުގައި އޮތް ވިޔަފާރީގެ ފުރުސަތުތައް ބޭނުން ކުރެވޭ މިންވަރު އިތުރުވާނެ ކަމެއް ކަމަށެވެ. އެއީ ޗައިނާއިން އިތުރު އިންވެސްޓްމެންޓްތަކާއި ފަންނުވެރިކަން ގެނެވި ތަފާތު ދާއިރާތައް އިތުރުވާނެ ކަމެއް ކަމަށް ވެސް އޭނާ ވިދާޅުވި އެވެ.
"މާލީ ދާއިރާއިން ޗައިނާ އާއި ދިވެހިރާއްޖެ ގުޅިގެން ކުރާ މަސައްކަތް އާ އުސްމިނަކަށް ގެންދެވޭނެ. އަދި އަޅުގަނޑުމެންގެ ގުޅުމުގެ ކުރިމަގު އިތުރަށް އުޖާލާވާނެ،" ސަފީރު ވިދާޅުވި އެވެ.