އޯޓިޒަމްއާ ޕެރަސެޓަމޯލްއާ ގުޅުވައި ޓްރަމްޕު ސާބިތު ނުހިފޭ ވާހަކަ ދައްކައިފި
މިހާރު
23 ސެޕްޓެމްބަރު 2025 | އަންގާރަ | 6:47
އޯޓިޒަމް ހުންނަ ދަރިން ލިބުމާ، މާބަނޑު ދުވަސްވަރު ޕެރަސެޓަމޯލް ބޭނުންކުރުމާ ގުޅުން ހުރި ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕު ސާބިތު ނުހިފޭ ވާހަކަތަކެއް ދެއްކެވުމުން ސައިންސްވެރިން ކަންބޮޑުވުން ފާޅުކުރަން ފަށައިފި އެވެ.
އޯޓިޒަމާ ބެހޭ ގޮތުން ހާއްސަ އިއުލާނުކުރުމެއް އެބަ އޮތް ކަމަށް ވައިޓް ހައުސް އިން ބުނުމަށް ފަހު ޓްރަމްޕު ދެއްވި ބަޔާނުގައި ވިދާޅުވީ މާބަނޑު މީހުން ޓައިލެނޯލް ބޭނުންކޮށްގެން ނުވާނެ ކަމަށެވެ. ޓައިލެނޯލް އަކީ ޕެރަސެޓަމޯލްގައި ހުންނަ އެސެޓަމިނޯފެންގެ އެންމެ މަޝްހޫރު ބްރޭންޑް ނަމެވެ. އަދި އެމެރިކާގައި ވެސް މިއަށް އާންމުކޮށް ކިޔާ ނަމެވެ.
މުޅި ދުނިޔޭގައި އުފައްދާ ޕެރަސެޓަމޯލްގެ 40 ޕަސެންޓަށް ވުރެ ބޮޑު ބައެއް ބޭނުންކުރަނީ އެމެރިކާ މީހުން ކަމަށް ހިސާބުތަކުން ދައްކަ އެވެ. އަދި އެސެޓަމިނޯފެން ހުންނަ ބޭސްތަކަށް ކޮންމެ އަހަރަކު ހަތަރު ބިލިއަން ޑޮލަރު އެމެރިކާގައި ހޭދަކުރާ ކަމަށް ވެސް ދައްކަ އެވެ.