އެލިއާ ބްލަޑް ކޭމްޕް ހޮނިހިރު ދުވަހު ބާއްވަނީ
މިހާރު
23 ސެޕްޓެމްބަރު 2025 | އަންގާރަ | 1:59
އެލިއާއިން މޯލްޑިވިއަން ބްލަޑް ސާވިސްއާ ގުޅިގެން ބާއްވާ ބްލަޑް ޑޮނޭޝަން ކޭމްޕެއް އަންނަ ހޮނިހިރު ދުވަހު އޮންނާނެ ކަމަށް އެލިއާއިން ބުނެފި އެވެ.
އެ ކޭމްޕް އޮންނާނީ ހުޅުމާލޭގައި ހުންނަ އޮރެންޖު ހިޔާގައި މިހާރު ހިންގާ ތެލެސީމިއާ ސެންޓަރުގަ އެވެ. އެ ކޭމްޕު ކުރިއަށް ދާނީ ހޮނިހިރު ދުވަހު ހެނދުނު 9 އިން ހަވީރު 6 އަށެވެ. މި ބްލަޑް ކޭމްޕުގެ މަގުސަދަކީ ލޭ ހަދިޔާކުރުމަކީ ދިވެހިންނަށް އަހުލުވެރި ކަމަކަށް ހެދުމާ އެކަކު އަނެކަކަށް އަޅާލައި، ބޭނުންޖެހޭ ހިނދު ތައްޔާރަށް ތިބޭ މުޖުތަމައުއެއް ބިނާކުރުން ކަމަށް އެލިއާއިން ބުންޏެވެ.
ނޭޝަނަލް ބްލަޑް ސާވިސްއިން ބުނީ ލޭ ހަދިޔާކުރާ ދަރުމަވެރިންގެ އަދަދު މަދުވެފައިވުމުން ލޭ ހޯދުމަށް ބޮޑެތި ދަތިތަކަކާއި ގޮންޖެހުންތަކާ ކުރިމަތިވެފައިވާ ކަމަށެވެ. އަދި ފުރަތަމަ ފަހަރަށް ލޭ ހަދިޔާ ކުރާ ފަރާތްތަކުގެ އަދަދު މަދުވެފައިވާ ކަމަށް ވެސް ބުންޏެވެ.