ފްލޮޓީލާއަށް އިޒްރޭލުން ހުރަސްއެޅުން ރައީސް ކުށްވެރިކުރައްވައިފި
މިހާރު
2 އޮކްޓޯބަރު 2025 | ބުރާސްފަތި | 11:19
އިޒްރޭލުން ފަލަސްތީނުގެ ޣައްޒާ ހިސާރުކޮށްފައި އޮންނަ އޮތުމާ ދެކޮޅު ހެދުމަށް، ކަނޑުމަގުން ޣައްޒާއަށް ދާން ދުނިޔޭގެ އެކި ގައުމުތަކުގެ އެކްޓިވިސްޓުން ދަތުރުކުރި "ގްލޯބަލް ސުމޫދު ފްލޮޓީލާ" އިޒްރޭލުން ހުއްޓުވުމުން ރައީސް ޑރ. މުހައްމަަދު މުއިއްޒު މިއަދު އެކަން ކުށްވެރިކުރައްވައިފި އެވެ.
ގާތްގަނޑަކަށް 45 އުޅަނދު ހިމެނޭ ފްލޮޓީލާގެ ދަތުރުގައި އެކި ގައުމުތަކުގެ ސިޔާސީ މީހުންނާއި ގާނޫނީ ވަކީލުންނާއި ފަލަސްތީނުގެ ހައްގުގައި ވަކާލާތުކުރާ އެކްޓިވިސްޓުންގެ 500 ވަރަކަށް މީހުން ހިމެނެ އެވެ.
އެ އުޅަނދުތައް ބައިނަލް އަގުވާމީ ކަނޑުގެ ސަރަހައްދުގައި ތިއްބާ އިޒްރޭލުން އެ އުޅަނދުތައް ހުއްޓުވައި އެކްޓިވިސްޓުން ހައްޔަރުކުރުމުން، ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ އިޒްރޭލުގެ އެ އަމަލަކީ އަޅާނުލައި ދޫކޮށްލައިގެންވާނެ ކަމެއް ނޫން ކަމަށެވެ. މިހާރު ވެސް މިނިވަންކަމާއި ޒަރޫރީ ތަކެތިން މަހުރޫމްކޮށްފައި ތިބި ބަޔަކަށް އެހީގެ ތަކެތި ހިފައިގެން ދިޔަ ގާފިލާއަކަށް ހަމަލާދިނުމަކީ ބައިނަލްއަގުވާމީ ހުރިހާ ގާނޫނަކާ ހިލާފު ކަމެއް ކަމަށް އެ މަނިކުފާނު ވިދާޅުވި އެވެ.