ފެނަކަ އޮޑިޓް 2023 ވަނަ އަހަރު ފެށި އިރު، އެ ކުންފުނީގެ 12،000 ޕާޗޭސް އޯޑަ (ޕީއޯ) ހުރީ ސިސްޓަމަށް ނާޅާ ކަމަށާއި ކުންފުނިތަކުން ރެކޯޑުތައް އެންމެ ފުރިހަމައަށް ނުބެލެހެއްޓުމުގެ ސަބަބުން އޮޑިޓްތައް ވަރަށް ބޮޑަށް ލަސްވާ ކަމަށް އޮޑިޓަ ޖެނެރަލް ހުސެއިން ނިޔާޒީ އިއްޔެ ވިދާޅުވެއްޖެ އެވެ.

މާލިއްޔަތު ކޮމިޓީގައި ނިޔާޒީ ވިދާޅުވީ، ފެނަކައިގެ ގާތްގަނޑަކަށް ތިން ބިލިއަން ރުފިޔާގެ މުދަލާއި ހިދުމަތްތައް ހުރީ ސިސްޓަމަށް ނާޅާ ކަމަށާއި އެފަދަ ކަންކަން ކުންފުނިތަކުން އިސްލާހުކުރަން ޖެހޭ ކަމަށެވެ. އޭނާ ވިދާޅުވީ، އޮޑިޓްތަކުގެ މަސައްކަތްތައް ދިގުލައިގެން ދާ އެއް ސަބަބަކީ ކުންފުނިތަކުން ރެކޯޑު ބެލެހެއްޓުމުގެ ކަންކަން ބޮއްސުންލާފައި ހުރުން ކަމަށެވެ.

ފެނަކައިގެ އެންމެ ފަހުގެ އޮޑިޓް ރިޕޯޓުން އެނގޭ ގޮތުން އެ ކުންފުނިން ބިޑަކާ ނުލައި 1.3 ބިލިއަން ރުފިޔާގެ މަޝްރޫއު ހަވާލުކޮށްފައިވެ އެވެ. އަދި އޭރުގެ ވެރިކަން ކުރި ޕާޓީގައި އިސްކޮށް ހަރަކާތްތެރިވި ބައެއް މީހުންގެ ހިއްސާއޮތް ކުންފުނިތަކަށް ފައިދާވާ ގޮތަށް ގިނަ ޕްރޮޖެކްޓްތަކެއް ދީފައިވާކަން ވެސް ފާހަގަކުރެވިފައިވެ އެވެ.

މައުޟޫޢުތަށް