241 ކޮމިޓީގެ ރިޕޯޓް: ކަސްޓަމްސްގެ ކޮރަޕްޝަނާ ހެދި ބޯޑަރު ފޫވެއްޓި އާމްދަނީ ވެސް ދަށަށް!
މިހާރު
27 އޮކްޓޯބަރު 2025 | ހޯމަ | 3:11
ރާއްޖޭގެ ކަނޑުގެ ބޯޑަރު ރަނގަޅަށް ނުބެލެހެއްޓޭ ފަދަ ބޮޑެތި މައްސަލަތައް މޯލްޑިވްސް ކަސްޓަމްސް ސާވިސްގެ ތެރޭގައި ހުރި ކަން ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އިން ހެދި އިންކުއަރީއަކުން ހޯދައި، އެ ކަންކަން ރަނގަޅުކުރަން މުހުލަތުތަކެއް ދީފި އެވެ.
ވަގަށް ސިނގިރެޓް އެތެެރެކުރާ މައްސަލަ 241 ކޮމިޓީން ބެލި އިރު ފެންމަތިވި އެހެން ގިނަ މައްސަލަތަކެއްގެ ތަފްސީލު އެ ކޮމިޓީން އިއްޔެ އާއްމުކުރި ރިޕޯޓްގައި ހިމަނާފައި ވެ އެވެ. މާ ބޮޑު ބަހުސެއް ނުކޮށް، މަޖިލީހުގެ މިއަދުގެ ޖަލްސާގައި ފާސްކުރި އެ ރިޕޯޓުގައި ކަސްޓަމްސްގެ މައްސަލަތައް ހައްލުކުރަން ގިނަ އަދަދެއްގެ ރިކޮމެންޑޭޝަންތައް ވެސް ހިމަނާފައި ވެ އެވެ.
ރިޕޯޓްގައިވާ ގޮތުން ކަސްޓަމްސްގެ އެތެރޭގައި އޮތް އިހުމާލުތަކާއި ކޮރަޕްޝަނުގެ ސަބަބުން، ރާއްޖޭގެ ބޯޑަރު ފޫވެއްޓުމުގެ އިތުރުން ކަސްޓަމްސް މެދުވެރިކޮށް ދައުލަތަށް ލިބެން ޖެހޭ އާމްދަނީ ދަނީ ދަށްވަމުންނެވެ. ކޮމިޓީން ގާތްގަނޑަކަށް އަހަރެއްހާ ދުވަސް ވަންދެން ކުރިއަށް ގެންދިޔަ ތަހުގީގަށް ފަހު، އެކުލަވައިލި އެ ރިޕޯޓްގައި ކަސްޓަމްސްގެ އޮފިސަރުންގެ ހުުރި ގިނަ މައްސަލަތަކަކާއި ޖުމްލަކޮށް ކަސްޓަމްސްގައި ހުރި ބޮޑެތި ގިނަ މައްސަލަތަކެއް ފާހަގަކޮށްފައި ވެ އެވެ.