އިސްލާމްއާބާދުގައި ވެސް ބޮން ގޮއްވައި 12 މީހަކު މަރާލައިފި، ޕާކިސްތާނުން ކުށްވެރިކުރީ އިންޑިއާ
މިހާރު
11 ނޮވެމްބަރު 2025 | އަންގާރަ | 6:48
ޕާކިސްތާނުގެ ވެރިރަށް އިސްލާމްއާބާދު ކޯޓު އިމާރާތެއްގެ ބޭރުގައި އަމިއްލައަށް މަރުވެގެން ދިން ބޮމުގެ ހަމަލާއެއްގައި މިއަދު 12 މީހަކު މަރާލައިފި އެވެ.
އިސްލާމްއާބާދުގައި މިފަދަ ހަމަލާއެއް ނުދޭތާ އެތައް އަހަރެއް ފަހުން ދިން މި ހަމަލާގައި 12 މީހަކު މަރުވުމުގެ އިތުރުން 27 މީހަކު ޒަހަމްވެފައިވާ ކަމަށް އިންޓީރިއާ މިނިސްޓަރު މުހްސިން ނަގްވީ ވަނީ ވިދާޅުވެފަ އެވެ. އަދި މިއީ އިންޑިއާގެ އެހީތެރިކަމާ އެކު ޓެރަރިސްޓުން ދިން ހަމަލާއެއް ކަމަށް ޕާކިސްތާނުގެ ބޮޑުވަޒީރު ޝާހްބާޒް ޝަރީފް ވަނީ ތުހުމަތުކުރައްވައިފަ އެވެ.
އިސްލާމްއާބާދުގައި އެންމެ ފަހުން މިފަދަ ބޮމުގެ ހަމަލާތައް ދީފައިވަނީ 2022 ވަނަ އަހަރުގެ ޑިސެމްބަރު މަހުގެ ތެރޭގަ އެވެ.