ދިއްލީގައި ދިނީ ޓެރަރިސްޓް ހަމަލާއެއް ކަމަށް އިންޑިއާއިން ބުނެފި
މިހާރު
12 ނޮވެމްބަރު 2025 | ބުދަ | 9:20
މިދިޔަ ހޯމަ ދުވަހު އިންޑިއާގެ ވެރިރަށް ނިއު ދިއްލީގެ ރެޑް ފޯޓް ސަރަހައްދުގައި ކާރެއް ގޮވައި، މަދުވެގެން 12 މީހަކު މަރުވި ހާދިސާ އަކީ ޓެރަރިސްޓު ހަމަލާއެއް ކަމަށް އެ ގައުމުން ރަސްމީކޮށް ކަނޑައަޅައި އިއުލާނުކޮށްފި އެވެ.
"ފެނިގެން މި ދިޔައީ ގައުމިއްޔަތާ ދެކޮޅު ބާރުތައް އަޑީގައި ތިބެގެން ދިން ރަހުމުކުޑަ ޓެރަރިސްޓު ހަމަލާއެއް،" ހާދިސާގެ ހަގީގަތަކީ ކޮބައިކަން ފުރަތަމަ ފަހަރަށް ހާމަކޮށް ނެރުނު ކެބިނެޓް ބަޔާނުގައި ބުނެފައިވެ އެވެ.
ބޮޑުވަޒީރު ނަރެންދުރަ މޯދީ ޗެއާކުރެއްވި، ކެބިނެޓްގެ މަތީ ފެންވަރުގެ ބައްދަލުވުމަކަށް ފަހު ނެރުނު ބަޔާނުގައި ބުނީ މިއީ ގައުމާ ދެކޮޅު ބާރުތަކުން ހިންގި ފިނޑި އަމަލެއް ކަމަށެވެ. އިންޑިއާއިން ޓެރަރިޒަމްގެ ކޮންމެ އަމަލަކާ މެދު ވެސް "ޒީރޯ ޓޯލަރެންސް" ގެންގުޅުމުގެ ސިޔާސަތުގެ ދަށުން މި ހަމަލާއާ މެދު ވެސް އަމަލުކުރާނެ ކަމަށް ބަޔާނުގައިވެ އެވެ.