ސްނޯ ޕާކު ނަގައި ގޭމު ކުޅޭ ތަނެއް ހަދަނީ
މިހާރު
26 ނޮވެމްބަރު 2025 | ބުދަ | 11:34
ފިނި މޫސުމުގެ އިހުސާސްތައް ކުރެވޭ ގޮތަށް ސަލްޓަން ޕާކުގައި ހެދި ވިންޓާ ބިލްޑިންގް ނަގައި އެ ތަނުގައި ގޭމު ކުޅޭ މަރުކަޒެއް ހެދުމުގެ މަސައްކަތް ކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ސަލްޓަން ޕާކުގެ އިރު ދެކުނު ކަނުގައި ކުރިން ކަޅުވަކަރު މިސްކިތް ހުރި ބިމުގައި ސްނޯ ޕާކެއް ހެދީ ހައުސިން މިނިސްޓަރަކަށް މުއިއްޒު ހުންނެވި ދުވަސްވަރު އެވެ. ޖޫން، 2018 ގައި އެ ތަން ހުޅުވައި ބޭނުންކުރަން ފެށުމުން ބޮޑު ތަރުހީބެއް ލިބިގެން ދިޔަ އެވެ.
ޓިކެޓު ގަނެގެން ވަންނަން ޖެހޭ ގޮތަށް ހުޅުވި ވިންޓާ ތީމް ޕާކު ގިނަ ބަޔަކު ބޭނުންކުރަމުންދިޔަ ނަމަވެސް އެ ޕާކު އޮޕަރޭޓް ކުރަން ހަވާލުކުރި ޑައިމަންޑް ވިންގްސް ޕްރައިވެޓް ލިމިޓެޑުން އޮޕަރޭޓް ނުކޮށް ފަހުން "ފިލީ" އެވެ. އެހެންވެ، އެ މީހުން ހޯދަން 2021 ގައި މާލޭ ސިޓީ ކައުންސިލުން އިއުލާނެއް ވެސް ކުރި އެވެ.