އޮފީސް ހަރަދު ކަނޑާލާ ބިލުގެ ބަހުސްގައި ފަލާހުގެ ބަހުގެ ހަމަލާތައް ޔާމީނަށް
މިހާރު
27 ނޮވެމްބަރު 2025 | ބުރާސްފަތި | 2:22
ކުރީގެ ރައީސުންގެ އޮފީސް ހިންގަން ދައުލަތުން މަހަކު 175،000ރ ދިނުން ހުއްޓާލުމާއި އެ ބޭފުޅުންގެ އިނާޔަތްތައް ކުޑަކުރުމާއި އެ ނޫން ވެސް ބައެއް ބަދަލުތައް ގާނޫނަށް ގެންނަން ސަރުކަރުން ހުށަހެޅި ބިލުގެ ބަހުސްގައި ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްެރާހީމް ފަލާހު، ކުރީގެ ރައީސް އަބްދުﷲ ޔާމީނަށް ވަރުގަދަ ބަހުގެ ހަމަލާތަކެއް މިއަދު ދެއްވައިފި އެވެ.
ސަރުކާރުގެ ފަރާތުން ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު ހުށަހެޅުއްވި އެ ބިލަށް މަޖިލީހުގެ ޖަލްސާގައި ކުރި ބަހުސްގައި ފަލާހު ވިދާޅުވީ، ރައީސްކަން ކުރައްވާފައިވާ ބޭފުުޅުންނަށް ހިމާޔަތާއި ރައްކާތެރިކަން ދޭން ޖެހޭނެ ކަމަށާއި އެއީ ގައުމަށް ވަރަށް ބޮޑު ހިދުމަތެއް ކުރައްވާފައިވާ ބޭފުޅުން ކަމަށެވެ. ނަމަވެސް އޭނާ ތުހުމަތު ކުރެއްވީ ބައެއް ރައީސުން ވެރިކަން ކުރެއްވި އިރު ދައުލަތުގެ ހަޒާނާ އިން ވަރަށް ގިނަ އަދަދެއްގެ "ފައިސާ ނަންގަވައިގެން" ވަރަށް ބޮޑެތި ގެތައް އަޅުއްވާފައި އެބަހުރި ކަމަށެވެ.
"އެހެންވީމާ ހަގީގަތުގައި އެ ގޭގޭގައި ވެސް މި އިނާޔަތް ނުދިން ކަމުގައި ވިޔަސް އޮފީސް ހިންގުމަކީ ހަމަ ދައުލަތުން ފައިސާ ދީގެން އޮފީސް ހިންގުން ކަމަށް ރައްޔިތުންނަަށް ބެލެވެނީ،" ފަލާހު ވިދާޅުވި އެވެ.