ޖިންސީ ފުރައްސާރަ ކުރިކަން ސާބިތުވުމުން ފެރިދޫ ކައުންސިލްގެ ރައީސް ސަސްޕެންޑުކޮށްފި
މިހާރު
27 ނޮވެމްބަރު 2025 | ބުރާސްފަތި | 1:50
އއ. ފެރިދޫ ކައުންސިލްގެ ރައީސް އިސްމާއިލް ޝާހުގެ މައްޗަށް ޖިންސީ ފުރައްސާރައިގެ މައްސަލައެއް ސާބިތުވާ ކަމަށް ވަޒީފާއާ ބެހޭ ޓްރައިބިއުނަލުން ނިންމުމުން، އޭނާ ތިން މަސް ދުވަހަށް ސަސްޕެންޑުކުރަން އެލްޖީއޭއިން މިއަދު ނިންމައިފި އެވެ.
އެ ކައުންސިލް އިދާރާގައި މަސައްކަތްކުރި އިދާރީ މުވައްޒަފަކަށް ޖިންސީ ފުރައްސާރަކުރިކަން މަދަނީ މިންގަނޑުން ސާބިތުވާ ކަމަށް ޓްރައިބިއުނަލުން ނިންމީ ސެޕްޓެމްބަރު 21، 2025 ގަ އެވެ. އެއާ އެކު، އެލްޖީއޭއިން އިންކުއަރީއެއް ހަދައި އެ އަށް ޖަވާބުދާރީ ވުމަށް ޝާހުއަށް ހަތް ދުވަހުގެ މުއްދަތެއް ދިނުމަށް ފަހު، އެ އިންކުއަރީން ފާހަގަވި ކަންކަން މިއަދު ވަނީ އާއްމުކޮށްފަ އެވެ.
އެ މައްސަލައާ ގުޅިގެން އެލްޖީއޭއީން ނެރުނު ބަޔާނެއްގައި ބުނީ ޝާހުގެ މައްޗަށް ޖިންސީ ފުރައްސާރައިގެ މައްސަލަ ސާބިތުވާ ކަމަށް ކަނޑައެޅުމުން ގާނޫނުން ކައުންސިލްގެ ރައީސްގެ މައްޗަށް މަތިކޮށްފައިވާ ޒިންމާއާ ހިލާފުވެފައިވާކަން ކަށަވަރު ވެފައިވާ ކަމަށެވެ.